Nur-Sultan qalasynda 680-ge jýyq qaraýsyz qalǵan nysandar men jeliler anyqtaldy
Ákimniń dereginshe,Nur-Sultanda 680-ge jýyq ıesiz jatqan, qaraýsyz qalǵan nysandar men jeliler anyqtaldy. Onyń 126 shaqyrymy elektr, 7,5 shaqyrymy sýmen jabdyqtaý jáne 14 shaqyrymy káriz jelileri. Sondaı-aq, 200-ge jýyq transformator men 76 transformatorlyq qosalqy stantsııa balansqa alynbaǵan.
«10 qarashada oryn alǵan jaryqtyń sónýi elektr jelilerindegi problemalardy anyqtady. Merdiger kabel kanalyn tóseý kezinde (Syǵanaq jáne Aqmeshit kósheleriniń qıylysynda) jumysqa nemquraıly qarap, óz isin sapasyz atqarǵan. Komıssııa málimetterine sáıkes, týyndaǵan órt polıetılen qubyrlarynyń durys ornalaspaýynan kúsheıgen. Nátıjesinde bir arnada jatqan negizgi jáne rezervtik qýat kabelderi zardap shekti. Sotqa deıingi tergeý jalǵasýda. Kabelderdi salý jumystary eki jyl buryn júrgizilgen, jeliler balansqa alynbaǵan. Qazir biz ıesiz, qaraýsyz qalǵan jeliler men nysandardy balansqa qabyldaý boıynsha josparly jumys júrgizýdemiz», - dedi A. Kólginov.
Munan bólek, ákimniń aıtýynsha, sýmen jabdyqtaý jáne káriz jelileri boıynsha mehanıkalyq áserlerge tótep bere almaıtyn shyny plastık jáne gofrlengen qubyrlardy paıdalaný problemasy anyqtaldy. 34 ýchaskede osyndaı qubyrlar ornatylǵan (90 shaqyrym). Ashyq lıýkter men qudyqtar da ıesiz qalǵan múlik qataryna jatady. Elordada barlyǵy 102 myń lıýk bar. Turǵyndardyń ashyq qudyqtarǵa qulaýyn boldyrmaý úshin lıýkterdiń tórtten bir bóligi (24,8 myń) arnaıy torlarmen jabdyqtalǵan. Budan basqa, pılottyq rejimde lıýkterge avtomattandyrylǵan monıtorıng júıesiniń datchıkteri ornatyldy.
