Nur-Sultan qalasy PD bastyǵynyń jeke qabyldaýyna 40-tan astam azamat jazyldy
NUR-SULTAN. QazAqparat - 21 qarashada Prezıdenttiń «Halyq únine qulaq asatyn memleket» tujyrymdamasyna kóshýdegi mindetterdi júzege asyrý aıasynda Nur-Sultan qalasynyń Polıtsııa departamentinde «azamattardy qabyldaýdyń biryńǵaı kúni» jalpy respýblıkalyq is-sharasy ótti, dep habaralıdy QazAqparat.
Elordalyq polıtsııa departamentiniń bastyǵy Erjan Sadenovtiń jeke qabyldaýyna 41 adam jazyldy. Azamattar kóbinese qylmystyq istiń tergelýi kezinde qyzmetkerdiń iske salǵyrt qarap, shara qoldanbaýy, jol qozǵalysynyń qaýipsizdigi sııaqty ózekti máselelerdi qozǵady.
Qosymsha zerdelenetin materıaldar boıynsha isterdi departament basshysy óz baqylaýyna aldy. Sonymen qatar, daý týǵyzǵan azamattyq quqyqtyq suraqtarymen kelgen azamattarǵa osy máselelerdiń sheshimi tolyqqandy túsindirildi.
Naqty faktiler boıynsha basshy laýazymdy tulǵalarǵa azamattardyń shaǵym-aryzdary boıynsha tıisti sheshim qabyldaýǵa tapsyrmalar berdi.
Mysaly, 65 jastaǵy qala turǵyny belgisiz bireýler oǵan qatysty alaıaqtyq áreketter jasaǵany týraly habarlady. Osy habar boıynsha azamattyń aryzy tirkelip, tergeý júrgizý uıǵaryldy.
Sonymen qatar, úsh azamat alaıaqtyq faktileri boıynsha qylmystyq isterdiń salǵyrt qaralýyna shaǵymdanǵan. Osy máseleler boıynsha departament basshysy isti jan-jaqty, tolyq qaralýyn qadaǵalap, tıisti shara qoldanyp, aryzdanýshylarǵa jaýap berýlerin qatań eskertti.
Qabyldaý sońynda azamattar birde-bir aryz-shaǵymy qaraýsyz qalmaıtynyna jáne ister aıaǵyna deıin júrgiziletinine senim bildirdi.
