Nur-Sultan qalasy memleket damýynyń lokomotıvine aınaldy - Altaı Kólginov
NUR-SULTAN. QazAqparat - Elorda ákimi Altaı Kólginov astanalyqtar men qala qonaqtaryn Elorda kúnimen quttyqtady, dep habarlaıdy QazAqparat ákimdik saıtyna sileme jasap.
«Qazaqstannyń astanasy - Nur-Sultan qalasy - Táýelsizdik jyldaryndaǵy memleketimizdiń áleýmettik-ekonomıkalyq jáne saıası jetistikteriniń beınesi, elimizdiń ósip kele jatqan qýatyn jáne onyń odan ári damýynyń joǵary áleýetin kórsetedi» , - delingen ákimniń quttyqtaýynda.
Sondaı-aq, Altaı Kólginov Nur-Sultan qalasy memleket damýynyń lokomotıvine aınalǵandyǵyn jetkizdi.
«Nur-Sultan qalasy Qazaqstannyń halyqaralyq bedelin nyǵaıta túsedi jáne memleket damýynyń lokomotıvine aınaldy, onyń bolashaq ekonomıkalyq turǵydaǵy kórinisi bolyp sanalady. Bul álemniń jetekshi megapolısterimen senimdi túrde básekege túsetin qala, 21 jyl ishinde álemdik qaýymdastyqtardy damý qarqynymen jáne jyldamdyǵymen tańqaldyra otyryp, úlken serpilis jasaı aldy», - dedi ákim.
