Nur-Sultan qalasy Arystaǵy úılerdi qalpyna keltirýge úles qosýda

NUR-SULTAN. QazAqparat - QR Premer-Mınıstriniń orynbasary Jeńis Qasymbekpen Nur-Sultan qalasynyń ákimi Altaı Kólginov Arysqa kelip, jarylystan keıingi qalany qalpyna keltirý jumystarymen tanysty, dep habarlaıdy elorda ákimdiginiń saıty.

Elorda basshysy Nur-Sultan qalasyna bekitilgen 9-sektordaǵy birqatar qurylys nysandaryn aralap kórdi. Nur-Sultan qalasynyń shtab tóraǵasy, qala ákiminiń orynbasary Altynbek Qaısaǵalıev búgingi kúni júrgizilip jatqan jumystardyń nátıjesimen tanystyrdy.

«Qurylys eki baǵytta júrip jatyr. Ol kúrdeli jóndeý jumystary jáne súrilgen eski úıdiń ornyna jańa turǵyn úı kóterý. Bizge 1467 nysan bólingen. Onyń 57-si kópqabatty turǵyn úı bolsa, 717 jeke turǵyn úıler. Búginde súrilgen 156 úıdiń 120-dan astamy irgetasy qalanyp, shatyry jabylýda. Qaıtadan salynǵan 7 úıde qurylys tolyǵymen aıaqtaldy. Qalǵan 30-dan astam úıde kirpish qalaý jumysy bastaldy», - dedi Altynbek Qaısaǵalıev.

Onyń aıtýynsha, eki aı ishinde qaıta qalpyna keltirý boıynsha 402 páterdiń jóndeý jumystary aıaqtalǵan. Taǵy 280-nen astam páterdi jóndeý júrgizilip jatyr. Qalpyna keltirýge berilgen 482 jeke turǵyn úıdiń 283-inde jóndeý jumystary tolyq aıaqtalǵan. Qalǵan úılerde tıisti jóndeý jumystary júrgizilýde.