Nur-Sultan qalasy 2021 jyly 1 trln teńgeden astam ınvestıtsııa tartty

NUR-SULTAN. QazAqparat - Elorda qansha ınvestıtsııa tartty jáne qala kásipkerlerine qandaı qoldaý kórsetip keledi? Elordanyń Investıtsııalar jáne kásipkerlikti damytý basqarmasynda 2021 jylǵa arnalǵan negizgi kórsetkishterdiń ósýi týraly aıtyldy, dep habarlaıdy qala ákimdiginiń resmı saıty.

Osy jyldyń 11 aıynyń qorytyndysy boıynsha basqarmanyń negizgi kórsetkishteri 1 trln. al negizgi kapıtalǵa salynǵan ınvestıtsııalar kólemi 5,8% ósimmen 1 trln. teńgeden asty.

Sondaı-aq, ónerkásip ónimi kóleminiń 14% - ǵa artqany baıqalady. Óńdeý ónerkásibinde 1,1 mlrd. teńge somasyna ónim óndirildi. Aıta keteıik, elordada óńdeý ónerkásibiniń negizgi salalary: metallýrgııa, mashına jasaý, ózge de metall emes mıneraldy ónimder men sýsyndar, tamaq ónimderin óndirý bolyp tabylady.

Osy oraıda bólshek saýda taýar aınalymynyń kólemi 1 312 mlrd. teńgeni qurady, bul 2020 jylǵy kórsetkishterden 7,7% - ǵa asty.

Basqarmada sondaı-aq karantındik shekteýlerge qaramastan, jumys istep turǵan shaǵyn jáne orta bıznes sýbektileriniń sany 13% - ǵa artyp, 161 622-ni quraǵanyn atap ótti. Osy jyldyń qańtar-maýsymynda shaǵyn jáne orta bıznes (ShOB) salasynda jumyspen qamtylǵandar sany tıisinshe 401,1 myń adamǵa deıin (11,9% - ǵa) ósti. Óz kezeginde, ShOB sýbektileriniń ósýi shyǵarylatyn ónimniń 3 981,7 mlrd.teńgege ulǵaıýyna alyp keldi.

«Іske asyrylyp jatqan shaǵyn jáne orta bıznesti qoldaýdyń memlekettik baǵdarlamalary aıasynda 89 mlrd.teńge ınvestıtsııa somasyna 1 700-den astam joba maquldandy. 2022 jyly ShOB salasyndaǵy negizgi kórsetkishter boıynsha ósý qarqynyn saqtaý josparlanyp otyr. Buǵan osy jyldyń qazan aıynda qabyldanǵan 2021-2025 jyldarǵa arnalǵan kásipkerlikti damytý jónindegi ulttyq joba yqpal etedi», - delingen vedomstvo habarlamasynda.