«Nur-Sultan-Qabanbaı batyr» avtojolyndaǵy apat: Zardap shekken 7 adamnyń ekeýi - bala
KÓKShETAÝ. QazAqparat - Aqmola oblysynyń Tselınograd aýdany aýmaǵynda jol-kólik oqıǵasy bolyp, 7 adam zardap shekti. Onyń ekeýi — bala, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, jol apaty naýryzdyń 23-inde Nura aýylynan 10 shaqyrym jerde, ıaǵnı «Nur-Sultan-Qabanbaı batyr» avtojolynyń 48 shaqyrymynda oryn alǵan. Bul týraly sol kúni saǵat 10:05 Tselınograd aýdandyq PB kezekshi bólimine jedel járdem feldsheri habarlap aıtqan.
«Oqıǵa ornyna jetken tártip saqshylary anyqtaǵandaı, Nur-Sultan qalasy baǵytynda júrip bara jatqan Qaraǵandy oblysynyń 36 jastaǵy turǵyny «Gazel» kóligimen joldyń qarsy baǵytyna shyǵyp ketip, 44 jastaǵy astanalyq basqarǵan «Lada Largus» kóligimen soqtyǵysqan. Saldarynan jeńil kóliktiń júrgizýshisi men jolaýshylary (barlyǵy 7 adam, onyń ekeýi bala) zardap shegip, Nur-Sultan qalasynyń №2 qalalyq aýrýhanasyna jetkizildi», - dedi vedomstvodan.
Qazirgi kezde, osyǵan baılanysty Qylmystyq kodekstiń 345 baby boıynsha is qozǵalyp, sotqa deıingi tergeý amaldary júrgizilýde.
