Nur-Sultan Eýrazııanyń astanasyna aınaldy - Armenııa Prezıdenti
«Osy jerge alǵash kelgenim esimde. Kishkentaı ǵana qala bolatyn. Bul ulan-ǵaıyr oryn edi, qala joq-tyn. Odan keıin arman týyp, ony QR Tuńǵysh Prezıdenti - Elbasy Nursultan Nazarbaev shynaıy ómirde júzege asyrdy. Nebári 20 jyldyń ishinde Qazaqstan astanasynyń qalaı túrlengenin qarańyzdarshy. Búgin mine, Nur-Sultan degen tamasha qalamyz. Ony Eýrazııanyń astanasy dep aıtýǵa tolyq negiz bar», - degen A.Sarkısıan QR Tuńǵysh Prezıdentine shynaıy rızashylyǵyn bildirdi.
Sonymen qatar ol progressıvti damýǵa qatysty oıymen bólisti.
«Alǵashqy lokomotıvterdiń biri adamı kapıtal sanalady. Nursultan Nazarbaev atap ótkendeı, álemdegi eń iri 5 kompanııa mıneraldy resýrstar óndirmeıtindigi belgili. Bul kompanııalar HighTech pen ІT-tehnologııalar, sonymen qatar jasandy ıntellekt salasynda jumys isteıdi. Mundaı túrlenýdiń birneshe faktory bar. Onyń biri - adamı kapıtal, shyǵarmashylyq adamdary. Ekinshi faktor - tórtinshi ındýstrıaldyq revolıýtsııa. Biz jyldam revolıýtsııa evolıýtsııasyna engen sııaqtymyz. Bul ózgerister 30 jyldan keıin emes, kún saıyn oryn alady. Biz oǵan daıyn bolýymyz qajet», - dedi ol.
