«Nur-Sultan Dýatlon-2019» saıysyna 500-ge jýyq adam qatysty
NUR-SULTAN. QazAqparat - Elordada «Dýatlon-2019» sharasy ótip, oǵan shamamen 500 adam qatysty, dep habarlaıdy QazAqparat tilshisi qalalyq mádenıet jáne sport basqarmasyna silteme jasap.
Jarysqa qatysýshylar júgirý, velojarys sporty túrinen túrli úsh qashyqtyqty baǵyndyrady. Júgirý qashyqtyǵy 5 jáne 2,5 shaqyrymdy quraıdy, al velosıpedshiler 20 shaqyrymdy baǵyndyrýy tıis. Jarys tańǵy saǵat 08:00 «Báıterek» monýmentiniń janyndaǵy alańnan bastaldy. Júgirý joly Qonaev k-si, Qabanbaı batyr dańǵyly, Aqmeshit k-si, Dostyq k-si jáne Máńgilik el dańǵyly arqyly ótti. Sonymen qatar Qonaev kóshesinen bastap, Turan dańǵylynyń boıymen «Astana juldyzdary» monýmentine deıin (Qabanbaı batyr dańǵylymen aınalma jol) 20 shaqyrym joldy qatysýshylar velosıpedpen júrdi. Munda qatysýshylar keri burylyp, Turan dańǵylymen Dostyq kóshesine deıin, Máńgilik el dańǵylymen júrip, jarys Qonaev kóshesinde aıaqtaldy.
Dýatlon 16-29 jas, 30-39 jas, 40-49 jas, 50 jas jáne odan asqandar sanatynda ótti. Jarys bastalǵannan keıin 57 mınýt etkende máre syzyǵyn birinshi qatysýshy qıyp ótti. Ol Mark Starostın boldy.
«Men shańǵy jarysynan halyqaralyq dárejedegi sport sheberimin. Mundaı formattaǵy jarysqa alǵash ret qatysyp otyrmyn. Alda ótetin IRONMAN jarysyna daıyndyq retinde qatysyp kóreıin dedim. Aýa-raıy da jaqsy boldy, kún ystyq emes. Barlyǵy óte joǵary deńgeıde uıymdastyrylǵan», - dedi jeńimpaz.
Bıylǵy dýatlon Starostınder áýleti úshin jeńiske toly boldy, áıelder arasyndaǵy dodada Marktyń ápkesi - Darıa Starostına absolıýtti chempıon atandy. Boıjetkenniń aıtýynsha, olar bala kezden sportpen shuǵyldanýǵa beıim eken.
«Ákem men anam - shańǵy tebýden sport sheberleri, sondyqtan, sport bizdiń qanymyzda bar. Men úlken sporttan ketkenime 15 jyl boldy, biraq, ózim úshin sportpen shuǵyldanyp júremin únemi. Búgin qalamyzdyń sporttyq ómirine aralasyp kórgim keldi. Qashyqtyqty júgirip ótý kezinde ýaqytqa qaramadym, óz jaǵdaıyma qaraı júgirip óttim», - dedi Darıa.
Jarys qorytyndysy boıynsha 16-29 jas aralyǵyndaǵy erler jarysynda úzdik úshtikke kirgender; 1 oryn- Álimjan Baltabek. 2 oryn - Dmıtrıı Adamovıch, 3 oryn - Dmıtrıı Inkın, áıelder arasynda: 1 oryn - Ekaterına Brynza, 2 oryn - Dınara Kaparova, 3 oryn - Ekaterına Brynza.
Al, 30-39 jas aralyǵyndaǵy oryndarǵa myna adamdar ıe boldy: Erler arasynda 1 oryndy Arman Ǵalymov ıelense, 2 oryndy - Evgenıı Leontev, 3 oryndy - Sergeı Prohorov mise tutty, áıelder arasynda 1 oryn Gúlmıra Amenovaǵa, 2 oryn Elena Ponomarevaǵa, 3 oryn Elmıra Moldashevaǵa buıyrdy.
40-49 jas aralyǵyndaǵy jarysta erler arasynda 1 oryndy Marat Farrahov, 2 oryndy Qaırat Qoıanbaev, 3 oryndy Vadım Shýlınov ıemdendi. Áıelder arasynda máre syzyǵyn birinshi bolyp Gúlmıra Túıenbaeva kesse, ekinshi oryndy Mádına Berqalıeva aldy.
Al, 50+ jasyndaǵy dýatlonshylar arasynda altyn medaldi Rınat Salıkjanov, kúmisti Mendibaı Álimǵazın, qolany Marat Álimjanov ıelendi. Áıelder arasynda birinshi oryndy Tatıana Mıhaleva, ekinshi oryndy Irına Mýstafına enshiledi.
Sonymen birge, jarys aıaqtalǵan soń dýatlon qatysýshylary arasynda dástúr boıynsha 5 velosıped oınatyldy.
