Nur-Sultan dárigerleri 960 gramm salmaqpen dúnıege kelgen sábıge kútim jasap jatyr
NUR-SULTAN. QazAqparat - Búgin №2 qalalyq kópbeıindi aýrýhanada shala týǵan sábıdiń «qyrqynan shyǵarý» salty ótkizildi. Bul oqıǵa Anar Áshimovanyń otbasynda bolyp otyr, dep habarlaıdy QazAqparat elorda ákimdiginiń resmı saıtyna silteme jasap.
Aıta keteıik, №2 GMB akýsherlik blogyna orta eseppen 370-ke jýyq shala týǵan bala túsedi.
«Bala 5 aqpan kúni dúnıege keldi, salmaǵy - 960 gramm, boıy - 42 sm. Óte kishkentaı bolǵanmen densaýlyǵy jaqsy boldy», - deıdi neonatolog-reanımatolog Sholpan Nurashbekova.
Balaǵa Batyr esimi berildi. Ol 27-aptada kesar tiligi arqyly dúnıege keldi, óıtkeni anasynyń sýy az, ıaǵnı horıoamnıonıt boldy.
Qazirgi ýaqytta jańa týǵan náresteniń salmaǵy - 1 345 gramm. Bala týǵan sátten bastap dárigerlerdiń baqylaýynda.
Dárigerler qazaq halqynyń dástúrin saqtap, aýrýhana qabyrǵasynda «qyrqynan shyǵarý» rásimin ótkizdi.
Búginde sábı 40 kún boıy jańa týǵan nárestelerdiń reanımatsııa bólimshesinde jatyr. Gemodınamıkasy turaqty.
«Bul - meniń úshinshi balam. Men de, otbasym da №2 GMB akýsherlik blogyndaǵy medıtsına qyzmetkerlerine, jańa týǵan nárestelerdi reanımatsııalaý bólimine jaýapkershiligi, eńbekqorlyǵy men meıirimi úshin óte rızamyz. Munda eń myqty degen kásibı medıtsınalyq komanda jasaqtalǵan. Otbasylaryńyzǵa densaýlyq, baqyt, amandyq, barlyq ıgilik jáne tilekterińizdiń oryndalýyn tileımin. Atqarǵan jumystaryńyzǵa alǵysym sheksiz», - dep Batyrdyń anasy dárigerlerge alǵys aıtty.
Aıta keteıik, qyrqynan shyǵarý - bala ómirindegi eń qasıetti salt sanalady.
40 kúnge deıin náreste úshin bul álem qaýipti dep esepteledi. Sol sebepti jurt kózinen alshaqta bolyp, eshkimge kórsetilmeıdi.
