Nur-Sultan aýrýhanalarynda 363 jas maman jumysyn bastady
Olarǵa elordalyq dárigerlermen birdeı eńbek jáne demalys jaǵdaıy qarastyrylǵan.
Elordanyń medıtsınalyq mekemelerine 363 jas maman, onyń ishinde 226 ıntern, 113 rezıdent, 18 bakalavr, 5 magıstrant jáne bir doktorantýra túlegi jumysqa ornalastyryldy. Jas mamandar qalalyq aýrýhanalar, emhanalar, dıspanserler men qalalyq jedel járdem stantsııasyna jumysqa ornalasady.
Qazirgi ýaqytta jas mamandardyń 43-i qalalyq juqpaly aýrýlar ortalyǵy men «Ramada Plazadaǵy» provızorlyq statsıonarda orta jáne kishi medıtsına qyzmetkeri (maman sertıfıkaty joq) retinde jumys istep jatyr.
«Men elordalyq jańa juqpaly aýrýlar aýrýhanasynda meıirbıke bolyp isteımin. Bizdiń dárigerlerdiń qatty kúızelgenin kórip otyrmyz. Sondyqtan, osy qıyn kúnderde biz jumysqa shyǵyp, koronavırýs ınfektsııasymen aýyratyn naýqastarǵa kómektesýdemiz. Biz dárigerlerdiń basshylyǵymen ártúrli protsedýralyq tapsyrmalardy oryndaımyz. Biz dári tamyzǵysh qoıyp, ekpe jasap, naýqastardyń jaǵdaıyn qadaǵalaımyz», – deıdi jas maman Jandos Nasybaev.
Sonymen qatar Nur-Sultanda medıtsına ýnıversıteti men kolledjiniń 200-den astam túlegi pandemııa jaǵdaıynda jumys isteýge oqytyldy. Dárigerler jas áriptesterimen tájirıbe bólisti. Qazirgi ýaqytta olardyń barlyǵy jumysqa alynǵan jáne COVID-19-ben kúresýge atsalysyp júr.
«Búginde barlyq medıtsına qyzmetkerleri koronavırýs ınfektsııasymen kúreste aldyńǵy qatarda. Jas mamandar, stýdentter de shet qalmaı, bizdiń dárigerlerge belsendi kómektesýde. Tájirıbelik sabaqtyń aıasynda olar koronavırýs ınfektsııasymen aýyratyn naýqastarǵa kómek kórsetý úshin qalanyń medıtsınalyq mekemelerine barady. Jalpy, medıtsına ýnıversıteti men kolledjiniń 500-den astam túlegi COVID-19-ben kúresýge atsalysady», – dedi Nur-Sultan qalalyq densaýlyq saqtaý basqarmasy basshysynyń mindetin atqarýshy Álııa Rústemova.
Ár medıtsına uıymynda jas mamandarǵa keńes beretin aǵa maman bar. Barlyq mamandar qajetti jeke qorǵanys quraldarymen qamtamasyz etiledi.
