Nur-Sultan áýejaıy jabyq

«Nur-Sultan qalasynyń áýejaıy saǵat 16:30-dan 20:00-ge deıin qar tazalaý jumystaryn júrgizý úshin jabyldy. Aıta keterligi, «Qyzylorda-Nur-Sultan» áýe reısi elordadaǵy qolaıyz aýa raıyna baılanysty qosymsha aerodromǵa - Qaraǵandy qalasyna ushyp ketti», - dedi Nursultan Nazarbaev halyqaralyq áýejaıynyń baspasóz hatshysy Ánýar Shalekenov.

Sál keıinirek Ánýar Shalekenov elorda áýejaıy ushý-qoný jolaǵyn qardan tazalaý úshin túngi saǵat 00:00-ge deıin jabyq bolatyndyǵyn jáne munyń barlyǵy jolaýshylardyń qaýipsizdigin qamtamasyz etý maqsatynda jasalyp otyrǵandyǵyn habarlady.

Eske sala ketsek, áýejaı buǵan deıin bir reıstiń toqtatylyp, ekeýiniń basqa aılaqtarǵa jiberilgenin habarlady.

Qazirgi ýaqytta elordada qalyń qar jaýyp, boran soǵyp tur. Onyń ústine soltústik-batystan soqqan jeldiń jyldamdyǵy sekýndyna 9-14 metrge, oqtyn-oqtyn 15-20 metrge deıin jetedi.

Qalyń qar jáne borannyń saldarynan elordadan shyǵatyn 4 baǵyttaǵy jol jabylǵan.