Nur-Sultan ataýy elordamyzdy bıiktete túsetindigine kúmán joq - Álı Bektaev
«Osydan 26 jyl buryn, 1994 jyly sol kezdegi Joǵary keńestiń sessııasynda Elbasy N.Nazarbaev Qazaqstannyń astanasyn Almatydan Aqmolaǵa aýystyrý jónindegi ıdeıasyn jarııa etken kezde bul ıdeıaǵa sengenderden senbegender kóp boldy. Úmitten góri kúdik basym bolatyn. Ekonomıkalyq baılanystar úzilip, kásiporyndar jabylyp, jumysyzdyq kóbeıgen ýaqytta, aılap aılyq, jyldap jalaqy tólenbeı turǵan kezde astanany kóshirý eshqandaı sanaǵa sımaıtyn nárse bolyp kórinetin. Biraq, kóp uzamaı munyń uly ıdeıa ekendigne kózimiz jetti. Esildiń oń jaǵalaýyndaǵy eski qala adam tanymastaı bolyp ózgerdi. Sol jaǵalaýda álemdegi ozyq sáýlettik úlgidegi ǵımarattar boı kórsete bastady», - dep atap ótti senator.
Onyń aıtýynsha, Astananyń qurylysy el ekonomıkasyna úlken serpin berdi. Óndiristi damytýdyń, qurylys pen qurylys ındýstrııasyn órkendetýdiń lokomatıvine aınaldy. Elordaǵa qarap oblys ortalyqtary boı túzedi. Aýdan ortalyqtary kórkeıe tústi. Aınaldyrǵan 20 jyldyń kóleminde Qazaqstan astanasy álemniń jaýharyna aınaldy. Saryarqanyń sary dalasyna Astana daıyn kúıde túse salǵan syı sııaqty kórindi.
«Sonyń artynda qanshama eńbek pen erlik turǵanyn, kúlkisiz kúnder men uıqysyz túnder ótkenin bireý bilse, bireý bile bermeıdi. Sondyqtan bolsa kerek, biz túk bolmaǵandaı bas qalanyń jańa ataýyna baılanysty túrli oı-pikir aıtyp jatamyz. Ol da durys shyǵar. Demokratııalyq memleket quryp jatqannan keıin oı plıýralızminiń bolǵanyda ońdy. Ol álemde bolyp jatqan úrdis. Biraq, bizdiń óz dástúrimiz, saltymyz bar. Bizdiń eń úlken qundylyǵymyz - birlik pen yntymaq. Biz azamatymyzdy ardaqtap, urpaǵymyzdy qundaqtaı bilgen halyqpyz. Osy turǵydan alǵanda da Elbasynyń táýelsiz memleket turǵyzýdaǵy sheksiz eńbegin, tarıhı rólin eseptegende kúni-keshegi saıası ózgerister men qabyldanǵan tarıhı sheshimder bizdiń memleketimizdiń, halqymyzdyń órkenıettiligin kórsetti», - dedi ol.
Onyń atap ótýinshe, osy arqyly Qazaqstan halqy qaı kezeńde bolsa da pendeshilikten, alaýyzdyqtan, arandatýshylyqtan shet turatynyn dáleldedi. Al bul shyndyǵynda qaı memleket bolmasyn jetýdi maqsat tutatyn shynar bıiligi. Soǵan Qazaqstan jetip otyr. Qazaqstandyqtardyń basym kópshiligi astananyń Nur-Sultan dep atalýyna qoldaý kórsetýde.
«Nur-Sultan ataýy astanamyzdy odan ári bıiktete túsetindigine eshqandaı kúmán joq. Álemde Nursultan men Qazaqstan egiz uǵym bolyp tabylady. N.Nazarbaevty halyqaralyq deńgeıdegi reformator, beıbitshilik bastamalary men ıdeıalardyń avtory, ıadrolyq qarýsyz álem ıdeıasynyń bastaýshysy, táýelsiz memleket qurýdyń arhıtektory retinde moıyndaǵan alpaýyt elderdiń basshylary da, iri ınvestorlar da Qazaqstanǵa úlken senimmen qaraıtyndyǵyna eshqandaı kúmán joq. Osynyń barlyǵyna «táýbe» degimiz keledi», - dedi Álı Bektaev.
