Nur-Sultan, Almaty, Shymkent qalasynda jańa HQO ashylady
Jańa front-ofıster halyq kóp shoǵyrlanǵan Nur-Sultan, Almaty, Shymkent qalalarynda ashylady.
«Megapolısterdegi halyqtyń ósýi jedel sharalardyń qabyldanýyn talap etedi. Jarty jyldyń ózinde Almaty men Nur-Sultan shaharlarynda ǵana 3,5 mln qyzmet kórsetilgen. Tamyz aıynyń sońyna deıin biz astanamyz ben Almatyda qosymsha bir-bir halyqqa qyzmet kórsetý ortalyqtaryn ashatyn bolamyz. Oǵan qosa, Almaty qalasyndaǵy Alataý aýdanyndaǵy HQO bir aılyq úzilisten keıin qaıtadan óz qyzmetin jandandyrdy», – dep jazdy Ásemgúl Baltasheva.
Oǵan qosa, elimizdegi mamandandyrylǵan HQO sany artatyn bolady. Máselen, Almaty qalasynda altynshy avtoHQO ashylsa, oǵan jaqyn jatqan Talǵar jáne Qarasaı aýdandarynda taǵy bir-bir ortalyq iske qosylady. Ásemgúl Baltashevanyń aıtýynsha, jańa ortalyqtar tamyz, qyrkúıek aralyǵynda ashylady.
«Eń úlken kólik bazary osy megapolıste, jaqyn jatqan oblys turǵyndary sonda baryp kólikterin satyp, jańasyn alyp, tirkeý rásimderin de sonda jasatady. Jarty jyl ishinde Qazaqstanda kólik sektory boıynsha kórsetilgen qyzmet sany 1,5 mln jýyq bolsa, onyń 24 paıyzy Almatyǵa tıesili», – dep atap ótti Á.Baltasheva.
Oǵan qosa jazbada Shymkent qalasynda da mamandandyrylǵan HQO iske qosylady delingen. Osylaısha, bul shaharda qyrkúıek aıynan bastap 3 avtoHQO qyzmet kórsete bastaıdy.
Búginde Qazaqstanda 328 front-ofıs jumys isteıdi, kórsetiletin qyzmet túrlerine qaraı olar HQO, tsıfrlyqHQO, kóshi-qon HQO-sy, mamandandyrylǵan HQO-lar bolyp jikteledi. Jyl basynan beri alty aı ishinde onda qazaqstandyqtarǵa 15 mln qyzmet kórsetilgen.
Esterińizge sala keteıik, buǵan deıin QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev azamattarǵa qyzmet alý kezinde barynsha yńǵaıly jaǵdaı jasaý úshin jańa HQO-lardy, ásirese, mamandandyrylǵan HQO-lardy ashý múmkindigin qarastyrýdy tapsyrǵan bolatyn.
