Nur-Sultan - Almaty reısin oryndaý kezinde ushaqqa qus soǵylǵany anyqtaldy
ALMATY. QazAqparat – SCAT áýe kompanııasynyń ushaǵy «Nursultan-Almaty» reısin oryndaý kezinde quspen soqtyǵysyp qaldy, - dep habarlaıdy QazAqparat tilshisi.
«Reısti oryndaý kezinde ekıpaj bógde shýyldy estidi. Ushý kezinde qozǵaltqyshtardyń parametrleri normany kórsetti. Ushaq ekıpajy Almaty áýejaıynyń dıspetcherine habarlasty. Ushý jáne qoný shtattyq rejımde ótti», - dep habarlady kompanııadaǵylar.
Ushaqty tekserý kezinde qustyń izderi anyqtaldy. Áýe kemesi búlingen joq. Qazirgi ýaqytta áýe kemesi tehnıkalyq qyzmet kórsetý talaptary belgilegen dıagnostıkadan ótip jatyr.
