Nur-Sultan ákimi qyzmetkerlerine áleýmettik jelide belsendi bolýdy tapsyrdy

NUR-SULTAN. Nur-Sultan ákimdiginiń resmı saıty «Feısbýkte» elorda aýdandary basshylary men ákimdiktiń qurylymdyq bólimsheleri basshylarynyń paraqshalaryn jáne olardyń uıaly telefondarynyń jeke nómirlerin jarııalaıdy, dep habarlaıdy Nur-Sultan ákimdiginiń baspasóz qyzmeti.

Baspasóz málimetterine qaraǵanda, elorda basshysy Baqyt Sultanov aýdan ákimderi men qalalyq basqarmalar men departamentterdiń basshylaryna turǵyndarmen tyǵyz baılanys ornatý úshin áleýmettik jelilerdegi jumysty jandandyrýdy tapsyrdy.

«Qazaqstan Prezıdenti Qasym-Jomart Toqaevtyń tapsyrmasy boıynsha barlyq aýdan ákimderi men basqarma basshylary qala turǵyndarymen turaqty baılanysta bolýǵa tıis. Kontenttiń mazmunyna erekshe nazar aýdarý qajet. Sondaı-aq, belgili bir áleýmettik jelige ǵana qosylýdyń qajeti joq. Aýdıtorııany naqty bilý ári seziný kerek. Mysaly, meniń bilýimshe, oqýshylar men stýdentter «VKontakte» jelisin paıdalanady. Sondyqtan bilim basqarmasynyń qyzmetkerleri tek «Feısbýkte» ǵana emes, «VKontakte» jelisinde bolýy kerek. «Tvıtterdi» ınvestıtsııalardy tartý, brendtiń atyn shyǵarý úshin paıdalanýǵa bolady. Sondyqtan bul tapsyrmany oryndaýǵa júıeli túrde kirisý kerek», - dep atap ótti Baqyt Sultanov.

Esterińizge sala keteıik, 27 naýryzda Qazaqstan Prezıdenti Qasym-Jomart Toqaev ákimderge halyqtyń saýaldaryna jedel jaýap berýdi tapsyrdy.

«Ákimder halyqtyń suranystaryna jedel den qoıyp, túsindirý jumystaryn júrgizý qajet. Áleýmettik jelilerde belsendi jumys isteý mańyzdy: messendjerlerde toptar quryp, júrgizilip jatqan saıasatty túsindirip, jaǵdaıdy jetildirý kerek», - dedi Q.Toqaev oblys, Nur-Sultan, Almaty jáne Shymkent qalalarynyń ákimderimen ótken keńeste.