Nur-Sultan ákimdigi Sanjar Táshkenbaıǵa oqý grantyn beredi
NUR-SULTAN. QazAqparat – Elorda ákimdigi Polshanyń Keltse qalasynda ótken jastar arasyndaǵy álem chempıonatynda «altyn» alǵan Sanjar Táshkenbaıǵa oqý grantyn beredi.
Bul týraly qala ákimi Altaı Kólginov áleýmettik jelide jazdy, dep habarlaıdy QazAqparat tilshisi.
«Polshada bokstan jastar arasyndaǵy ótken álem chempıonatynda elorda turǵyny Sanjar Tashkenbaı birinshi oryn aldy. Sanjar 11-synypta oqıdy, mektepten keıin ómirin tolyqtaı sportqa arnaýdy sheshti. Sanjarǵa joǵary oqý ornynda oqýǵa grant bólemiz, aqshalaı syıaqy tabystadyq. Sonymen qatar jastar arasyndaǵy bokstan álem chempıony aı saıyn 170 myń teńge kóleminde materıaldyq kómek alady. Jattyqtyrýshynyń eńbegin de atap óttik», - dep jazdy A. Kólginov óziniń Instagram paraqshasynda.
Ákim ár jeńistiń artynda jyldar boıǵy jattyǵýlar, úlken eńbek, erik pen minez turǵanyn atap ótti. Jarystar men chempıonattarda sportshylar tek óziniń, jattyqtyrýshylary men otbasynyń atynan ǵana emes, elimizdiń týyn jelbiretip, Qazaqstannyń atynan shyǵady.
«Óz tarapymyzdan sportpen aınalysý úshin budan ári de qoldaý kórsetip, jaǵdaı jasaıtyn bolamyz! Buǵan deıin jas sportshylar kezdesý barysynda aldaǵy ýaqytta da óz baǵytyn odan ári damytqysy keletinderin aıtty. Bolashaq chempıondarymyzdy qoldaý úshin jańa oqý jylynan bastap sport salasy boıynsha granttar sanyn kóbeıttik. Qazirgi sportshylar úshin aı saıynǵy materıaldyq mazmun mólsheri ulǵaıtyldy, ol sońǵy 10 jyl ózgerissiz bolǵan edi. QR qurama komandalary sapyndaǵy sportshylardyń, olardyń jattyqtyrýshylarynyń tólemderiniń artýy ómir súrý jaǵdaılaryn jaqsartady, kásibı deńgeıde sportpen shuǵyldanýǵa odan ári yntalandyrady. Buryn aı saıynǵy tólemdi ulttyq quramaǵa kirgen 84 sportshy ǵana aldy. Qazir olardyń sany eki eseden astam ósti», - deıdi elorda ákimi.
Qala basshysy sport – ımmýnıtet pen densaýlyqty nyǵaıtýǵa múmkindik beretin ómir salty ekenin eske saldy.
«Biz úshin qala turǵyndaryn jas kezinen buqaralyq sportqa tartý mańyzdy. Ol úshin qoǵamdyq keńistikter (saıabaqtar, skverler, býlvarlar), aýlalar salamyz, sporttyq mekemeler jelisin keńeıtemiz, velojoldar salamyz jáne t. b. Memleket basshysy halyq arasynda buqaralyq sportty damytýǵa jáne belsendi salaýatty ómir saltyn nasıhattaýǵa erekshe kóńil bóledi», - deıdi Altaı Kólginov.
Aıta keteıik, Polshanyń Keltse qalasynda ótip jatqan jastar arasyndaǵy álem chempıonatynda qazaqstandyqtar eki «altyn», eki «kúmis» aldy.
