Nur-Sultan ákimdigi halyqty dári-dármekpen úzdiksiz qamtamasyz etýdi tapsyrdy
NUR-SULTAN. QazAqparat - Qala basshylyǵy halyqty dári-dármekpen qamtamasyz etý úshin ýaqtyly shara qabyldaýda, dep habarlaıdy QazAqparat elorda ákimdiginiń resmı saıtyna silteme jasap.
Ákimdik qalalyq dárihanalarda vırýsqa qarsy dári-dármekterdiń bolýyn únemi qadaǵalap otyrady. Elordada koronavırýs ınfektsııasy jaǵdaılarynyń kóbeıýine baılanysty vırýstyq ınfektsııalyq aýrýlardyń aldyn-alý úshin qajetti dári-dármekpen qamtamasyz etýge erekshe nazar aýdarý qajet.
«Elordalyq dárihanalarda turǵyndarǵa qajetti barlyq dári-dármek bolýy kerek. Dári-dármektiń negizgi assortımentiniń bolýyn baqylaý qajet. Dárihanalarǵa dárini ýaqtyly jáne jetkilikti mólsherde satyp alý kerek», – dedi Nur-Sultan ákiminiń orynbasary Baqtııar Máken dárihana jelileri basshylarymen onlaın-kezdesýde.
«Biz kóterme dárihana uıymdaryna Nur-Sultan qalasynyń dárihanalyq uıymdaryna dári-dármek pen medıtsınalyq maqsattaǵy buıymdardy úzdiksiz jetkizýdi uıymdastyrýdy tapsyramyz», – dep atap ótti B.Máken.
«Nur-Sultan qalasynyń farmatsevtıkalyq assotsıatsııasy» zańdy tulǵalar qoǵamdyq birlestiginiń dırektory Gúlnaraı Almýrzınanyń aıtýynsha, keıbir dári-dármektiń tapshylyǵy baıqalady.
«Ótken aptadan bastap qala turǵyndary vırýsqa qarsy preparattar, azıtromıtsın antıbıotıkterin satyp aldy. Biz analız júrgizip, dári-dármektiń 41 ataýy kórsetilgen keste qurdyq. Memlekettik agenttiktiń dári-dármekti halyqqa qansha mólsherde taratýǵa bolatyny týraly memorandýmǵa qol qoıatyn boldyq. Al antıbıotıkter men retsept boıynsha dári-dármek burynǵydaı dárigerdiń nusqaýymen ǵana satylady», – dedi G.Almýrzına.
Sonymen birge, ol dene qyzýyn túsiretin dári-dármek jetispeýshiligin eskere otyryp, olardyń balama nusqasy bar ekenine nazar aýdardy: «Panadol», «Eferalgan», «Ibýprofen», «Ibýfen», «Mıg», «Novıgan» - olar dárihanada bar.
24 maýsymdaǵy jaǵdaı boıynsha, qalada koronavırýs juqtyrýdyń 3484 jaǵdaıy tirkelgen.
Onyń ishinde 2 501 naýqas (69%) emdelip shyqty jáne 38 ólim jaǵdaıy (1,1%) oryn aldy. Kúndelikti pnevmonııamen aýrýhanaǵa túsetin naýqastardyń sany artty, olardyń ár ekinshisi vırýstyq pnevmonııa. Onyń 90-ynyń jaǵdaıy ortasha aýyr.
Osyǵan baılanysty medıtsınalyq uıymdar men dárigerlerge aýyr jumys júkteledi.
Ákimniń orynbasary azamattardy koronavırýs ınfektsııasyn juqtyrmas úshin qatań sanıtarlyq qaýipsizdik sharalaryn saqtaýǵa shaqyrdy: maska, qolǵap kıip, qoldy sabynmen jıi jýyp, áleýmettik qashyqtyq saqtaý qajet.
