«Nur Suńqar» jýrnalıster baıqaýynyń jeńimpazdary anyqtaldy
Atap aıtqanda, bıyl baıqaý onynshy ret ótkizilýde. Búgingi tańda baıqaý elimizdegi medıa salasynyń qyzmetkerlerin yntalandyrýǵa baǵyttalǵan bedeldi is-sharalarynyń birine aınaldy.
«Jańa tehnologııalar damyp keledi, suranys ózgerýde. Kóp adamdar álemettik jeliden aqparat alady. Kez kelgen adamda óz pikirin, oıyn áleýmettik jeli arqyly halyqqa jetkizý múmkindigi bar. Degenmen, kásibı jýrnalısterdiń mańyzdy róli halyq úshin óte qajet», - dedi «Nur Otan» partııasy Tóraǵasynyń birinshi orynbasary Baýyrjan Baıbek marapattaý rásiminde.
Onyń sózine qaraǵanda, Parlament Májilisiniń depýtaty Qýanysh Sultanov tóraǵalyq etken komıssııa músheleri BAQ ókilderi arasynan jeńimpazdardy anyqtady.
«Ońaı bolǵan joq, myńnan astam ótinim kelip tústi. Úzdikterdi anyqtaý úshin komıssııa músheleri obektıvti ári ashyq túrde sheshim qabyldady», - dedi B. Baıbek.
Sonymen qatar, búgingi saltanatty sharada BAQ ókilderin quttyqtaýǵa QR Aqparat jáne qoǵamdyq damý mınıstri Dáýren Abaev arnaıy keldi.
«Búgingi mańyzdy oqıǵamen barlyqtaryńyzdy quttyqtaımyn. «Nur Suńqar» syılyǵy medıa-landshafty ózgertti dep aıtýǵa bolady. Bul turǵyda oń nátıje jalǵasyn tabady dep senemin. Úzdikter laıyqty marapattarǵa qol jetkize bersin», - dedi mınıstr.
Bıylǵy ótken baıqaý nátıjesi negizinde jeńimpazdar 10 atalym boıynsha anyqtaldy. Sonymen, «Nur Suńqar-2019» baıqaýynyń jeńimpazdary mynalar:
«Halyq daýysy» atalymynda úzdik televızııalyq jýrnalıst bolyp «Qazaqstan» RTRK «Apta» baǵdarlamasynyń redaktor-sarapshysy Aıbek Qobdabaı;
«Kózqaras» atalymynda úzdik televızııalyq jýrnalıst bolyp «Habar24» telearnasynyń shyǵarýshy redaktory Juraǵat Baman;
«Sóz zergeri» atalymynda úzdik gazet jýrnalısi bolyp «Egemen Qazaqstan» gazeti bas redaktorynyń orynbasary Ǵabıt Músirep;
«Sóz sheberi» atalymynda úzdik gazet jýrnalısi bolyp «Lıter» respýblıkalyq qoǵamdyq-saıası gazetiniń tilshisi Talǵat Isenov;
«Medıa-profı» atalymynda úzdik ınternet basylym jýrnalısi bolyp Bnews.kz aqparat agenttiginiń bas redaktory Aqmaral Oljabaeva;
«Jas serpilis» atalymy boıynsha úzdik jas jýrnalıst retinde «Habar» telearnasy» AQ saraptamalyq baǵdarlamalar bóliminiń tilshileri Sáken Mahametkerimov pen Nazymgúl Kúmispaeva tanyldy.
Sonymen qatar, «Elbasy salǵan sara jol» atalymynda Elbasy qyzmetin eń jaqsy kórsetken jarııalanym úshin marapatyn «Kazahstanskaıa pravda» gazetiniń arnaıy tilshisi Igor Prohorov ıelendi.
«Maıtalman» atalymynda otandyq jýrnalıstıkaǵa sińirgen eńbegi úshin syılyǵy Nurtileý Imanǵalıulyna («Jetisý» telearnasy) berildi.
Munymen qosa, «Partııalyq jobalar jaıly jaryq kórgen eń jaqsy jarııalanym úshin» atalymynyń syılyǵy «Astana TV» telearnasynyń aqparattyq-saraptalamalyq baǵdarlamalar qyzmetiniń arnaıy tilshisi Ekaterına Brynıýk pen «Aıqyn» gazetiniń sholýshysy Gúljan Rahmanovaǵa tabystaldy.
«Rýhanı jańǵyrý» Qoǵamdyq sanany jańǵyrtý baǵdarlamasyn ilgeriletýge qosqan úlesi taǵaıyndalǵan syılyq «Astana Telearnasy» JShS-nyń atqarýshy prodıýseri Bazarkúl Otynshıeva men «Abaı» jýrnalynyń tilshisi Aıgúl Kemelbaevaǵa berildi.
