«Nur Otan» Túrkistan oblysynda «Mektepke jol» aktsııasyn jalǵastyrýda

SAIRAM. QazAqparat – Túrkistan oblysynda «Nur Otan» partııasy «Mektepke jol» aktsııasyn jalǵastyrýda. Partııanyń Saıram aýdandyq fılıaly áleýmettik az qamtylǵan kópbalaly otbasylarǵa kıim-keshekter men oqý quraldaryn tartý etti, dep habarlaıdy QazAqparat tilshisi.

Aktsııa barysynda aýdandyq partııa fılıalyna kelip ótinish bildirgen ata-analardyń balalaryn jańa oqý jylyna daıyndaýǵa kómek kórsetildi. Sharaǵa «Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev, Saıram aýdanynyń ákimi Baqtııar Mamaev, aýdandyq máslıhat depýtattary men jergilikti turǵyndary qatysty. Óz kezeginde Beısen Tájibaev sóz sóılep, oqýshylardy jańa oqý jylymen quttyqtady.

«Nur Otan» partııasynyń dástúrli túrde ótkizetin «Mektepke jol» respýblıkalyq aktsııasy aıasynda biz áleýmettik az qamtylǵan otbasylarǵa qol ushyn berip kelemiz. Bıylǵy jylǵy aktsııanyń bastamasy Saıram aýdanynan bastaldy. Barlyq búldirshin mektepke tolyqqandy oqý jabdyqtarymen qamtylmaýy bizdiń azamattyǵymyzǵa úlken syn. Partııa atynan uıymdastyrylyp jatqan aktsııaǵa máslıhat depýtattary, «Nur Otan» partııasy fraktsııasynyń músheleri men partııalas áriptesterimizdiń qosqan úlesi zor. Jas óskinderdiń muqtajdyǵyna eshqashan jol bermeımiz»,– dep atap ótti B.Tájibaev.

Aktsııa sheńberinde partııa fılıalyna balalaryn mektepke daıyndaýǵa kómek berýin suraǵan 24 otbasy músheleriniń 50 oqýshysyna mektepke qajetti oqý-quraldarymen jasaqtalǵan sómkeler berildi. Sharaǵa qatysqan saıramdyqtar ótinishterin qaraýsyz qaldyrmaı kómek kórsetken «Nur Otan» partııasynyń fılıalyna alǵystaryn bildirdi. Atap óteıik, búgingi kúnge deıin aýdandyq máslıhat depýtattary, partııa fraktsııasynyń músheleri men partııalastar tarapynan 845 otbasyǵa 4 152 400 teńge kóleminde materıaldyq kómek kórsetilgen.