«Nur Otan» tegin jedel jelisi men Whatsapp messendjerin iske qospaq

ASTANA. QazAqparat - Halyqpen jumys tıimdiligin arttyrý maqsatynda 7 jeltoqsannan bastap «Nur Otan» partııasy jedel jelini iske qosady. Biryńǵaı jeliniń on bir sandyq nómiri - 8 800 080 4441.

Endi azamattar Qazaqstannyń kez kelgen núktesinen tegin qońyraý shalýǵa múmkindik alady (osy ýaqytqa deıin tegin qońyraýlar tek qana oblys ortalyqtarynan 59-78-50 nómirine habarlasýyna bolatyn edi. Bul jeli 7 jeltoqsannan bastap óshiriledi). Jedel jeliniń jumys tártibi saǵat 8-den 19-ǵa deıin dúısenbi men juma kúnderiniń aralyǵynda. Jumys ýaqytynan tys jáne demalys kúnderi qońyraýlar jazylyp otyrady. Eshbir ótinish qaraýsyz qalmaıdy. Sondaı-aq azamattar habarlamalardy jáne Whatsapp messendjeri arqyly sýret pen vıdeony + 7 700 800 4441 nómirine jibere alady. Azamattar jedel jeli arqyly «Nur Otan» partııasy múshesiniń Ádep kodeksin buzǵany men zańsyz áreketteri, onyń ishinde memlekettik organdaǵy laýazymdy tulǵalardyń jemqorlyq zań buzýshylyqtary, bıýdjettik qarjylardyń, onyń ishinde «Nurly jol» baǵdarlamasyna, sondaı-aq basqa da memlekettik jáne salalyq, óńirlik baǵdarlamalarǵa baılanysty tıimsiz paıdalanylǵan derekteri boıynsha habarlaı alady. Sonymen qatar azamattardyń jeke máseleleri boıynsha qabyldaýyna jazylyp, ótinishterdiń qaralý barysyn bilip, keńes alyp, memlekettik organdar qyzmetiniń tıimdiligin arttyrý, zańnamany jetildirý t.b. boıynsha usynystar berýge bolady, dep habarlaıdy nurotan.kz.