«Nur Otan» ShQO-daǵy aýyzsýǵa muqtaj aýyldyń máselesin baqylaýǵa aldy

ÓSKEMEN. QazAqparat - «Nur Otan» partııasynyń ókilderi Shemonaıha aýdanynyń Qyzyl Shemonaıha aýylyna aýyzsý tartý jobasynyń barysyna reıd jasady, dep habarlaıdy QazAqparat tilshisi.

Qurylysy keshikken joba byltyr jeltoqsanda bitýi tıis bolǵan. Aýyl halqy aýyzsýdy kútip áli otyr. Aýdan ákiminiń orynbasary Baqytjan Moldahanovtyń aıtýynsha, mundaı kemshilikke merdiger kompanııanyń salǵyrttyǵy sebepker bolǵan.

«Qyzyl Shemonaıha aýylyna sý toǵany 1970 jyly salynǵan.  Sondyqtan orynan jańasyn salý áldeqaıda tıimdi edi. 2013 jyly daıyn bolǵan jobaǵa qarjy 2,5 jyldan keıin ǵana tabyldy.  «Nurly» jol baǵdarlamasy aıasynda 262 mln teńge bólingen bolatyn. Nysan ýaqytynda berilmegen soń, is sotqa ketti. Sot sheshmi boıynsha «Óskemen Qurylys»  kompanııasyna qalǵan jumysty 2018 jyldyń qańtaryna deıin bitirýdi tapsyrylǵan. Nátıje joq» - deıdi ákimdik ókili.

Qurylystyń jobalyq smetasyna orta jolda ózgeris engen eken. Bul da merzimnen keshigýine ákep soqtyrǵan. Ondaı bastamany kótergen tapsyrys berýshiniń ózi bolyp otyr.

«Qubyr júretin jerden jartas beldeýi shyqty. Eger ony aınalyp ótetin jańa joba jasalmasa, aýyzsý aýyl úshin altynnyń baǵasyndaı qymbatqa túsetin edi. Partııalyq qadaǵalaý komıssııasy jer qyrtysyn esepke alý kerek degen ustanymda. Óıtkeni o basta qubyrdyń jobasy durys jasalmaǵan.  Sol úshin aýdan bıýdjetinen 3,4 mln teńge bólinip otyr. Jetildirilgen joba tek tamyzdyń aıaǵyna qaraı daıyn bolmaq. Odan keıin qubyr tartý jumystaryna qosymsha qarjy izdestirilmek. Óıtkeni, jumys kesheýildegen shaqta ıgerilip úlgermegen 68 mln teńge respýblıkalyq bıýdjetke qaıtarylǵan bolatyn» - deıdi «Nur Otan» partııasynyń aýdandyq fılıal tóraǵasynyń birinshi orynbasary Elena Shabanova.