«Nur Otan» praımerızi: Alǵashqy tirkeý kúni 1 myńnan astam ótinim túsken

NUR-SULTAN. QazAqparat – «Nur Otan» praımerızine kandıdattardy tirkeýdiń alǵashqy kúninde qazaqstandyqtardan 1 myńnan astam ótinim tústi. Bul týraly «Nur Otan» partııasy Tóraǵasynyń birinshi orynbasary Baýyrjan Baıbek málim etti, dep habarlaıdy QazAqparat.

«Keshe elimizde «Nur Otan» praımerızi bastalǵanyn jaqsy bilesizder. Partııa Lıderi Nursultan Nazarbaevtyń tapsyrmasymen ol tuńǵysh ret respýblıkalyq partııaishilik saılaý aýqymynda ótedi. Bul – Elbasy bastamasymen partııa jumysyn «qaıta jandandyrý» maqsatynda qolǵa alynǵan «Senim. Dıalog. Bolashaqqa nyq qadam» baǵdarlamasynyń qorytyndy kezeńderiniń biri.Kandıdattardy tirkeýdiń alǵashqy kúni 1 myńnan asa adam ótinish berdi. Olardyń 336-sy áıel, onyń 20-sy kópbalaly ana, 35 jasqa deıingilerden 228 azamat, sondaı-aq erekshe qajettiligi bar 8 adam. Bastaýysh partııa uıymdary arqyly 322 adam usynylsa, 717 kandıdat ózin-ózi usyndy.⠀

Elbasy Nursultan Nazarbaev keshegi úndeýinde atap ótkendeı, partııa óz isiniń sheberlerin, el taǵdyryna alańdaıtyn tulǵalardy, sheshim qabyldaı alatyn jáne konstrýktıvti usynystar jasaı alatyn jańa azamattardy bılikke usynatyn qaınar kóz bolýy tıis», - dep jazdy B.Baıbek Facebook-te. Onyń atap ótýinshe, partııaishilik saılaýdyń ashyq ári ádil ótýine partııa tarapynan qajetti jaǵdaı jasalǵan. Bastysy – aıqyndyq pen tazalyqty, barlyq qatysýshylarǵa teń múmkindik pen básekelestikti qamtamasyz etý.⠀
«Partııa Lıderi azamattardy tolǵandyryp júrgen kókeıtesti máselelerdiń ózara senim men syılastyq aıasynda kóteriletinine senim bildirdi. Kóterilgen máselelerdi partııa baqylaýǵa alýy tıis. Árbir aýdannyń, qalanyń, oblystyń saılaýaldy baǵdarlamasyna engizý úshin barlyq sheshimdi bıýdjettiń múmkindikterimen úılestire qarastyrý qajet.⠀
Elimizdiń aldynda pandemııadan keıin ekonomıkalyq ósimdi qalpyna keltirý, jumys oryndaryn qurý, shaǵyn jáne orta bıznestiń jumysyn jandandyrý mindetteri tur. Sonymen birge pandemııamen kúres máselelerin taldap, onyń ekinshi tolqyny oryn alýy múmkin jaǵdaıǵa daıyndalý qajet. Munyń barlyǵy partııanyń saılaýaldy baǵdarlamasyna engizilip, nurotandyqtardyń aldaǵy 5 jylda atqaratyn is-áreketterine baǵyt-baǵdar bolady.
Taǵy da barlyq partııalyqtar men «Nur Otan» jaqtastaryn eldegi asa mańyzdy saıası dodaǵa belsendi qatysýǵa shaqyramyn!», - dedi partııa Tóraǵasynyń birinshi orynbasary.

Avtor: Muhtar Asyljan