«Nur Otan» partııasynyń jemqorlyqpen kúreske baǵyttalǵan únparaqtar baıqaýy márege jetti

«Jemqorlyqqa qarsy osyndaı únparaqtar baıqaýy ótkizildi. Bular jaı ǵana qaralyp qalmaı, erteń jarııalanyp, jumys oryndarynyń aldynda, halyq kóp júretin jerlerde ilinetin bolady. Osy dertpen kúreske baǵyttalǵan bul sharany baqylaýǵa alamyz. Atap aıtqanda, oblystardaǵy jáne qalalardaǵy fılıaldar arqyly osyny halyqqa, buqaraǵa nasıhattaıtyn bolamyz»,- dedi Parlament Senatynyń depýtaty, «Nur Otan» HDP janyndaǵy Jemqorlyqpen kúres jónindegi respýblıkalyq qoǵamdyq keńestiń tóraǵasy Oralbaı Ábdikárimov.

Aıta keteıik, baıqaýǵa qatysý úshin 355 avtordan jemqorlyqpen kúres mazmunyndaǵy sýretter beınelengen 500-ge tarta týyndy kelip tústi. Bul sharaǵa respýblıkanyń óńirlerindegi mektep oqýshylarynan, stýdentterden, sondaı-aq áýesqoı jáne kásibı sheberlerdiń jumystary jınaldy.

Kórkemdigi jáne mańyzdylyǵy jaǵynan qoıylǵan talaptarǵa sáıkes uıymdastyrý komıteti birqatar jumysty iriktep alǵanyna toqtalǵan O. Ábdikárimov, «birinshi oryndy ıelengen 200 myń teńge, ekinshi orynǵa 150 myń teńge, sonymen qatar úshinshi oryn alǵanǵa 100 myń teńge kóleminde syıaqy taǵaıyndaldy»,-dedi.

Sonymen, atalǵan baıqaýda qazylar alqasy birinshi oryndy Saǵı Ahtanovqa, ekinshi oryndy Abaı Beısembetovke jáne úshinshi oryndy Sergeı Baıbýzanyń eńbekterine berdi.