«Nur Otan» partııasynyń Túrkistan oblystyq fılıalyna túsken ótinish sany 6 esege artqan
Konferentsııaǵa aýdandar men qalalardaǵy partııa ókilderi onlaın rejımde qosyldy. Májilisti partııanyń oblystyq fılıaly tóraǵasynyń birinshi orynbasary Beısenbaı Tájibaev sóılep, jyl basynan beri atqarylǵan jumystarǵa toqtaldy. Aldaǵy josparlaryn baıandap, partııanyń oblystyq fılıaly bıyl aýqymdy jumystar atqarǵanyn jáne birqatar ıgi isterge bastamashyl bola bilgenin jetkizdi. Onyń aıtýynsha, elimizde koronovırýs pandemııasyna baılanysty jarııalanǵan tótenshe jaǵdaı kezinde «Biz birgemiz» aktsııasy ótkizilgen. «Jas Otan» JQ belsendilerinen jasaqtalǵan eriktiler muqtaj otbasylarǵa «Esikten – esikke» prıntsıpi boıynsha azyq-túlik sebetteri taratylyp, 43540 otbasyna azyq-túlik sebetteri berilgen. Oǵan oblys kásipkerleri, partııa músheleri, oblystyq máslıhat depýtattary úles qosqan.
«Elbasy, partııa Tóraǵasy N.Nazarbaevtyń tapsyrmasymen qurylǵan «Birgemiz» respýblıkalyq qory arqyly óńirdegi 34055 otbasyna 50000 teńgeden berildi. Turǵyndar partııanyń bul bastamasyna rızashylyqtaryn bildirip jatyr. Sonymen birge óńirde «Ómir» jáne «Shıpa» jobalary qolǵa alyndy. Joba aıasynda 50 jasandy tynys alý apparatyna tapsyrys berilip, áleýmettik jaǵdaıy tómen 500-den astam otbasyna dári-dármek qobdıshalary tapsyrylyp jatyr. Partııa fılıalynyń qoǵamdyq qabyldaý bólmelerine 2020 jyldyń 16 naýryzynan 1 tamyzǵa deıingi aralyqta 15 184 aryz-shaǵym kelip túsip, 11 553-i /76,1%/ ońtaıly sheshilip, 3631-ine zań aıasynda keńes berildi. Jyldyń birinshi toqsanymen salystyrǵanda aryz-ótinishter sany 6 esege artqan. Turǵyndardyń aryz-shaǵymyn qabyldaý ári ótinishterin sheshý baǵytyndaǵy jumystar boıynsha Túrkistan oblystyq fılıaly respýblıkada 2-orynda tur», – dedi Beısenbaı Tájibaev.
Partııanyń fılıal tóraǵasynyń orynbasary sondaı-aq, búginde óńirde partııaishilik praımerızge daıyndyq jumystary júrgizilip jatqanyn jetkizdi. Onyń aıtýynsha, daýys berýge «Nur Otan» partııasynyń 80720 múshesi qatysady dep josparlanýda. Debattardy ótkizýge jáne daýys berýge arnalǵan 209 oryn belgilengen. Jıyndy túıindegen oblys ákimi, partııa tóraǵasy Ómirzaq Shókeev Memleket basshysy Qasym-Jomart Toqaevtyń daǵdarysqa qarsy kúres jónindegi tapsyrmalaryn negizge ala otyryp, jumysty júıeleý kerektigine toqtaldy. Partııa fılıaldaryna praımerızdi ádil ári joǵary deńgeıde ótkizý jóninde tapsyrma berdi.
«Elbasy, partııa Tóraǵasy Nursultan Nazarbaevtyń bastamasymen «Nur Otan» partııasynyń praımerız ótkizýi – otandyq partııalyq júıedegi demokratııalanýdyń jańa kezeńiniń bastaýy. «Myqty lıderler – myqty partııa» qaǵıdaty boıynsha ótetin praımerızde jurtshylyqtyń ártúrli áleýmettik toptaryn qamtýǵa kóńil bólinip otyr. Sondyqtan búgingi tańdaǵy mindetimiz – qoǵamdyq qubylystarǵa, el taǵdyryna beı̆-jaı̆ qaramaı̆tyn, daryndy da kreatıvti azamattardy aldaǵy praı̆merızge belsendi qatysýǵa shaqyrý. Partııa qataryn memleketshil azamattarmen tolyqtyryp, kadrlyq rezervti kúsheıtý kerek», – dedi Ó.Estaıuly.
