Nur Otan partııasynyń tekserýinen soń Jambyl oblysynda ákimniń orynbasary men bas dáriger jazalandy
NUR-SULTAN. QazAqparat – Jambyl oblysynda ákimniń orynbasary men bas dáriger jazalandy, dep habarlaıdy QazAqparat «Egemen Qazaqstan» basylymyna silteme jasap.
Jambyl oblysyndaǵy Merki aýdandyq aýrýhanasynyń ınfektsıonıst dárigeri Tolqynaı Ordabaeva jýyrda Feısbýk áleýmettik jelisine jazba jarııalap, saladaǵy birqatar kemshilikterdi aıtqan bolatyn.
Sonymen qatar, ol óziniń jazbasynda koronavırýs indetin juqtyryp, Taraz qalasynda em alyp jatqanyn aıta kele, bul iske oblystyq densaýlyq saqtaý basqarmasynyń basshysy Marat Jumanqulov pen aýdandyq aýrýhana bas dárigeriniń orynbasary Jańyl Shoıbekovany kinálaǵan bolatyn.
Málimetterge sáıkes, Nur Otan partııasynyń komıssııasy koronavırýs ınfektsııasyn juqtyrǵan dáriger Tolqynaı Ordabaeva jumys isteıtin Merki aýdanyndaǵy aýrýhanada zańbuzýshylyq baryn anyqtaǵan. Jazbada kórsetilgendeı, aýdandyq aýrýhana ákimshiligi medıtsına qyzmetkerlerine medıtsınalyq maskany ózderi tigýdi talap etken. Sondaı-aq, jumysta olarǵa maskalar men qorǵanys quraldary berilmegen. Osyǵan baılanysty Merki aýdandyq aýrýhanasy bas dárigeriniń mindetin atqarýshy Danııar Núsipbekov pen osy salaǵa jetekshilik etetin Merki aýdany ákiminiń orynbasary Marat Qasym partııalyq jaýapqa tartyldy.
Aıta keteıik, osyǵan deıin Jambyl oblysynyń Merki aýdanynda koronavırýs juqtyrǵan dárigerdiń shaǵymy boıynsha tekserý bastalǵandyǵyn jazǵan edik.
