«Nur Otan» partııasynyń saılaýshylar arasyndaǵy reıtıngi 80,9 paıyzdy qurady - Áleýmettik saıası zertteýler ınstıtýty

ASTANA. 6 qańtar. QazAqparat /Qanat Mámetqazyuly/  - «Nur Otan» Halyqtyq-demokratııalyq partııasynyń saılaýshylar arasyndaǵy reıtıngi 80,9 paıyzdy qurady. Bul týraly búgin saılaý naýqanynyń barysy boıynsha ózderiniń zertteý qorytyndylaryn jarııalap, baspasóz máslıhatyn ótkizgen Áleýmettik saıası zertteýler ınstıtýtynyń dırektory Aıgúl Sádýaqasova málimdedi.   

A.Sádýaqasovanyń aıtýynsha, zertteý saýalnamalarynyń nátıjesine oraı, saıası partııalarǵa qatysty saılaýshylardyń tańdaýynda birshama ózgerister baıqaldy. Máselen, birinshi saýalnama barasynda qoıylǵan «Siz qaı partııaǵa daýys beresiz?», - degen suraqqa «Nur Otan» HDP úshin respondentterdiń 80,5 paıyzy oń jaýaptaryn bergen bolsa, ekinshi saýalnamada kórsetkish 80,9 paıyzdy qurady. Al «Aq jol» partııasy óziniń reıtıngin 0,5 paıyzǵa joǵarylatyp, 7,5 paıyzdyq kórsetkishke ıe boldy. Jalpy-ulttyq sotsıal-demokratııalyq partııasyn tańdaǵandar 4,1 paıyzdy qurady. Bul osynyń aldyndaǵy saýalnama kórsetkishinen 1,7 paıyzǵa artyq.

Instıtýt jetekshisiniń aıtýynsha, suralǵandardyń 3,9 paıyzy Qazaqstannyń Kommýnıstik halyqtyq partııasyna tańdaý jasasa, Ádilet demokratııalyq partııasy - 1,2 paıyzdy, Qazaqstannyń patrıottar partııasy - 0,7 paıyzdy, al Aýyl Qazaqstandyq sotsıal-demokratııalyq partııasy 04 paıyzdy ıelengen.

«Al «Rýhanııat» partııasy saılaý úderisinen shettetilgeni belgili. Zertteýdiń birinshi kezeńinde atalǵan partııa suralǵandardyń 0,1 reıtıngisine ıe edi. Soǵan sáıkes, suralǵandardyń osy paıyzy basqa partııalar men jaýap berýge qınalǵandar sanaty arasynda bólindi deýge bolady. Bul rette suralǵan 1,2 paıyz respondent saılaýda kimge daýys beretinin áli sheshpegen bolsa, 0,1 paıyzy bul suraqqa jaýap berýden bas tartty», - deıdi  A. Sádýaqasova. Onyń málimetinshe, zertteý nátıjeleri saılaýǵa qatysty áli bir sheshimge kelmegen saılaýshylar kórsetkishiniń azaıǵanyn kórsetti. Bul óz kezeginde úgit-nasıhat jumystarynyń jurtshylyqqa belsendi áser etkenin bildiredi.

Esterińizge sala keteıik, bul - Áleýmettik saıası zertteýler ınstıtýtynyń saılaý naýqany barysyna oraı júrgizgen ekinshi zertteý jumysy. Saýalnamalyq zertteý sharasyna elimizdiń barlyq óńirleri men Astana jáne Almaty qalalarynan 2 myńǵa tarta respondent qatysty. Qatysýshylardyń áleýmettik-demografııalyq parametrlerine kelsek, suralǵandardyń 46,4 paıyzy er jáne 53,6 paıyzy áıelderdi qurady. 49,7 paıyzy qazaqtar bolsa, 38,1 paıyzy orystar, 12,2 paıyzy elimizde turyp jatqan basqa ult ókilderi bolyp tabylady.

Respondentterdiń jas erekshelikteri boıynsha 18-29 jas aralyǵyndaǵylar - 24,3 paıyzdy, 30-45 jas aralyǵyndaǵylar - 34,4 paıyzdy, 46-60 jas aralyǵyndaǵylar - 24,3 jáne 61 jastan joǵarylar - 17 paıyzdy quraǵan.

Suralǵandardyń 0,9 paıyzynyń bastapqy bilimi bar bolsa, aıaqtalmaǵan orta bilimdiler -3,9, orta bilimdiler - 33,8, kásibı-tehnıkalyq bilimi barlar - 24,7 paıyzdy qurady. Sondaı-aq, suralǵandardyń 30,5 paıyzynyń bilimi joǵary jáne ǵylymı dárejeleri bar bolyp otyr.