Nur Otan partııasynyń saılaýaldy baǵdarlamasyn iske asyrý jónindegi shtab qurylady
«Bıylǵy 12 aqpanda Májiliste «Nur Otan» partııasy fraktsııasynyń otyrysynda partııanyń «Ózgerister joly: Árkimge laıyqty ómir!» atty saılaýaldy baǵdarlamasyn iske asyrý jónindegi jol kartasynyń jobasy qaraldy. Álıhan Ashanuly, Sizge eki kún merzimde partııanyń saılaýaldy baǵdarlamasyn iske asyrý jónindegi shtab quryp, onyń otyrystaryn apta saıyn ótkizip turýdy tapsyrmamyn. Jol kartasynyń iske asyrylý barysyn ózim baqylap, shtab otyrystaryn aı saıyn júrgizetin bolamyn», - dedi Asqar Mamın birinshi orynbasary Álıhan Smaıylovqa qarata.
Úkimet basshysy aptanyń sońyna deıin ortalyq jáne jergilikti memlekettik organdar keminde birinshi basshylardyń orynbasarlary jetekshilik etetin jobalaý toptaryn qurý qajettigin tapsyrdy.
«Ulttyq ekonomıka mınıstrligi shtabtyń jumys organy retinde bıylǵy 1 naýryzǵa deıin Jol kartasy kórsetkishteriniń tsıfrlyq kartasyn ázirlesin. Jol kartasynyń ár is-sharasyna birinshi basshylardyń orynbasarlarynan kem emes deńgeıde jaýapty tulǵalar bekitilýi tıis. Parlamentpen naqty jáne úılestirilgen jumys júrgizý kerek. «Nur Otan» partııasynyń saılaýaldy baǵdarlamasyn tolyqqandy jáne tıimdi iske asyrý boıynsha barlyq sharalardy qabyldaýymyz kerek. Bul ár memlekettik organ jumysynyń basty krıterııi bolady», - dedi Premer-Mınıstr.
