«Nur Otan» partııasynyń sarapshylar toby elordalyq ІІD kóshpeli otyrys ótkizdi

ASTANA. 30 qazan. QazAqparat - Elordada 9 aıdyń qorytyndysy boıynsha elektrondy tehnologııalardyń kómegimen 49 myń quqyq buzýshylyq anyqtaldy, 310 tártip buzýshy qamaýǵa alyndy, dep habarlady Astana qalasynyń ІІD baspasóz qyzmeti. Osy jáne basqa da málimetter QR Parlamenti Májilisiniń depýtaty Qaıyrbek Súleımenov jetekshilik etken «Nur Otan» partııasynyń sarapshylar tobynyń kóshpeli otyrysynda jarııa etildi.

Negizinen, Qazaqstan Respýblıkasynyń Prezıdenti N.Á.Nazarbaevtyń «quqyq buzýshylarǵa qatysty noldik toleranttylyq» jónindegi tapsyrmalaryn oryndaý, quqyq buzýshylyqtyń aldyn alý máselesi talqylandy.

Vedomstvonyń habarlaýynsha, otyrysta usaq quqyq buzýshylyqtardy anyqtaý jumystaryna ákimshilik polıtsııanyń barlyq qyzmetteri, sonyń ishinde Patrýl polıtsııasy polki, tabıǵat qorǵaý polıtsııasy, 5570 áskerı bólimi tartylǵany atap ótildi. Sonymen qatar, qaladaǵy 7 joǵary oqý orny janynan qurylǵan 110 stýdentten turatyn jedel jastar otrıadtary qatysady. Olardyń qatysýymen jyl basynan beri tyıym salynǵan jerlerde temeki shegýdiń 203 faktisi, 79 buzaqylyq jaǵdaıy tirkeldi.

«Qaýipsiz aýla» baǵdarlamasyn júzege asyrý aıasynda 58 turǵyn úı kesheni beınebaqylaý júıelerimen jabdyqtaldy, 40 aýlaǵa PIK esebinen beınekameralar ornatyldy.

Budan basqa, elordada 652 beınebaqylaý kamerasy jumys isteıdi, sonyń nátıjesinde ústimizdegi jyldyń 9 aıynda 49 myńnan astam quqyq buzýshylyq anyqtalyp, 310 tártip buzýshy qamaýǵa alyndy. Bul týraly astana.kz habarlady.