Nur Otan partııasynyń sezine Almaty oblysynan 45 adam barady

TALDYQORǴAN.QazAqparat - Nur Otan partııasynyń kezekten tys on toǵyzynshy sezine Almaty oblysynan 45 adam barady. Olardyń qatarynda muǵalimder men dárigerler, kásipkerler jáne jas belsendiler bar, dep habarlaıdy QazAqparat tilshisi.

Alqaly jıynǵa qatysatyn delegattar partııanyń óńirlik fılıalynda ótken konferentsııada saılandy.

«Bul - óte úlken saıası naýqan. Búkil Qazaqstan halqy bolashaǵyn osy saılaýmen baılanystyryp otyr. Sondyqtan tyńǵylyqty daıyndyqpen kelip jatyrmyz», - deıdi Almaty oblystyq ardagerler keńesiniń tóraǵasy Ermek Kelemseıit.

Sonymen qatar basqosýda «Halyqqa kómek», «Baqytty otbasy», «Aýyl - el besigi», «Qutty meken» atty ulttyq jobalardyń júzege asyrylýy talqylandy. Bıyl áleýmettik turǵydaǵy áljýaz toptarǵa kómektesý maqsatynda jergilikti bıýdjetten 6 mlrd teńge bólingen. Al, Áleýmettik karta arqyly kópbalaly jáne turmysy tómen otbasylar úshin 3 mlrd teńgeden asa qarajat qarastyrylyp otyr.

Odan bólek, kásipkerler tarapynan muqtaj jandarǵa 125 mln teńgege qaıyrymdylyq jasaldy. Jıyn qorytyndysynda partııa ókilderi mańyzdy naýqan aldyndaǵy daıyndyǵyn pysyqtady.