Nur Otan partııasynyń Respýblıkalyq saılaýaldy shtaby Almaty oblysyna keldi
«Infraenergo» elektrotehnıka ónimderin shyǵaratyn kásiporyn ujymymen kezdesýde partııanyń óńirlik saılaýaldy baǵdarlamasynyń negizgi basymdyǵy talqylandy.
Osy kúni saılaýaldy shtab músheleri BAQ ókilderimen, otandas-qandastarmen jáne jastarmen kezdesti.
Almaty oblysyna sapary barysynda «Nur Otan» partııasy Tóraǵasynyń birinshi orynbasary Baýyrjan Baıbek birqatar azamatty qabyldady.
Máselen, qabyldaýda Nazerke Ábdihalyqova Raıymbek aýdanynda emhana salý máselesin kóterse, Shonjy aýylynan kelgen kópbalaly ana Zaǵıra Álimqojaeva salynyp jatqan jaldamaly turǵyn úı sanyn arttyrýdy ótindi. Al Amangeldi Sháripqulov Aıteı aýyly turǵyndarynyń elektrmen jabdyqtaý máselesin sheshý jónindegi ótinishin jetkizdi.
«Elbasy Nursultan Nazarbaev atap ótkendeı, «Azamattarmen árdaıym tyǵyz baılanysta bolý – bizdiń partııamyzǵa kórsetiletin taýsylmas halyqtyq qoldaýdyń qaınar kózi». Jalpy, úgit kezeńi bastalǵannan beri bizdiń qoǵamdyq qabyldaýlarǵa 56 myńnan astam ótinish tústi», - dedi partııanyń Respýblıkalyq saılaýaldy shtab jetekshisi.
Baspasóz qyzmetiniń habarlaýynsha, azamattardy negizinen kelesi máseleler tolǵandyrady: áleýmettik qamtamasyz etý - 22%, TKSh - 17%, turǵyn úı men jer ýchaskelerin bólý - 12%, jumysqa ornalastyrý jáne eńbek daýlary - 8%, densaýlyq saqtaý - 6%, bilim berý - 5% jáne t.b
