Nur Otan partııasynyń praımerız ótkizý erejesi jarııalandy

NUR-SULTAN. QazAqparat - «Nur Otan» partııasynyń Saıası keńesi bekitken, partııaishilik irikteýdi ótkizý erejesi jarııalandy. Buǵan deıin «Nur Otan» partııasynyń Lıderi Nursultan Nazarbaev 2020 jyldyń 17 tamyzy men 3 qazany aralyǵynda praımerız ótkizý týraly qaýlyǵa qol qoıǵan bolatyn, dep habarlaıdy QazAqparat.

Erejege sáıkes, praımerızdiń mindeti – «Myqty lıderler - Myqty partııa» qaǵıdaty boıynsha shynaıy jáne myqty kóshbasshylardy partııa qataryna tartý, belsendi jáne bastamashyl azamattar úshin «áleýmettik lıft» qurý, eldi damytý máselelerin talqylaýǵa kópshilikti jumyldyrý, aımaqtardaǵy júıeli jumys úshin ózekti máselelerdi anyqtaý, sondaı-aq, kandıdattardyń jeke jaýapkershiligin arttyrý.

Partııanyń qundylyqtaryn ustanatyn jáne saılaý quqyǵy bar kez kelgen qazaqstandyq úmitker bola alady. Eger kandıdat partııa múshesi bolmasa, ol praımerızge qatysýshylardy tirkeý merzimi aıaqtalǵanǵa deıin partııa qataryna qosyla alady.

Kandıdattar bastaýysh partııa uıymynan jáne bir oblys, qala nemese aýdannan ózin-ózi usyný jolymen de qatysýy múmkin.

Parlament Májilisiniń qazirgi depýtattary da praımerızge kandıdat retinde partııalardyń oblystyq fılıaldarynyń, sondaı-aq Nur-Sultan, Almaty jáne Shymkent qalalarynyń konferentsııalarynda jaryssózderge qatysady.

Úgit-nasıhat jumystaryn tikeleı kandıdattardyń ózderi júzege asyrady jáne ol partııa múshelerimen kezdesýdi, BAQ pen áleýmettik jelide maqala men jazbalar jarııalaýdy qamtıdy. Jaryssózderge qatysý barlyq kandıdattar úshin mindetti. Kandıdattar belgili bir eldi mekenderdiń máselelerin kásibı qyzmetke sáıkes sheshýge qatysty kózqarastaryn usynady.

Partııaishilik irikteý erejesinde daýys berý barysynyń ashyqtyǵyn qamtamasyz etý tetikteri qarastyrylǵan. Barlyq kezeńderdi Partııalyq baqylaý komıteti baqylaıdy. Al onyń quramyna partııa múshesi bolyp tabylmaıtyn qoǵam belsendileri de kiredi. Daýystardy sanaýdy ýchaskelik esep komıssııalary ár kandıdattyń baqylaýshylarynyń qatysýymen júrgizedi.

Zańnamalyq ózgeristerge sáıkes, partııalyq tizimderde keminde 30% áıelder jáne 20%-y 35 jasqa deıingi jastar usynylýy kerek.

Eske sala keteıik, keshe partııa Tóraǵasynyń birinshi orynbasary Baýyrjan Baıbek, aldaǵy praımerız – bul Elbasy jarııalaǵan «Nur Otan» partııasyn «qaıta jandandyrýdyń» mańyzdy bóligi bolyp tabylatyn partııaishilik demokratııanyń zamanaýı tetikteriniń biri ekenin atap ótken edi.

Praımerızdiń negizgi maqsaty – barlyq deńgeıdegi máslıhattar men Parlament Májilisindegi tıimdi depýtattyq korpýsty odan ári qalyptastyrý úshin básekelestik negizde jańa kóshbasshylardy aıqyndaý.

Onyń aıtýynsha, aldaǵy praımerızde qazirgi trendter eskerilip, dástúrli daýys berýmen qatar onlaın-daýys berýdi de ótkizý josparlanyp otyr.

«Partııamyzdyń Lıderi Nursultan Nazarbaev atap kórsetkendeı, «partııalyq tizimderge halyqtyń ártúrli bóliginiń ókilderi, bedeldi, azamattardyń senimine ıe bolǵan otandastarymyz kirýi tıis». Áleýmettik partııalyq lıftti qamtamasyz etý –partııamyz úshin basty mindetterdiń biri. Sondyqtan partııa múshelerimen qatar qoǵam ómirine beı-jaı qaramaıtyn, daryndy da kreatıvti barsha qazaqstandyqty aldaǵy praımerızge belsendi qatysýǵa shaqyramyz», - dedi ol.