«Nur Otan» partııasynyń partııaishilik saılaýyna qatysýǵa 3 myńnan astam azamat ótinish berdi
Bul málimetti búgin óziniń Facebook paraqshasynda «Nur Otan» partııasy tóaǵasynyń birinshi orynbasary Baýyrjan Baıbek jarııalady.
«Qurmetti dostar! Búginde Elbasy, partııa Lıderi Nursultan Nazarbaevtyń bastamasymen qolǵa alynǵan «Nur Otan»-nyń partııaishilik saılaýyna qatysýǵa búkil el boıynsha úmitkerlerdi usyný men tirkeý júrip jatqanyn jaqsy bilesizder. Tek alǵashqy eki kúnniń ózinde 3209 azamat ótinish berdi. Olardyń 1138-i – áıelder, onyń ishinde 48-i – kóp balaly ana. 788 kandıdat – 35 jasqa deıingi jastar, sondaı-aq 31-i – erekshe qajettilikteri bar azamat. Bastaýysh partııa uıymdary arqyly 1079 adam usynylsa, 2130 kandıdat – ózin-ózi usynǵandar.
Kez kelgen saılaý protsesiniń aıqyndyǵy men legıtımdiliginiń ajyramas belgileriniń biri táýelsiz baıqaýshylardyń qatysýy bolyp tabylady. Sondyqtan biz óńirlerdegi partııalyqtarmen birge jan-jaqty talqylaı otyryp, baıqaýshylardyń mindetteri men ókilettikterin anyqtaıtyn erejeni bekittik»,-deıdi Baýyrjan Baıbek.
Onyń aıtýynsha, saılaýda kandıdattyń senim bildirgen tulǵasy (partııa múshesi) baıqaýshy bola alady. Daýys berý kúni ol daýystardy sanaý rásimderi men ýchaskelerde daýys berý qorytyndylaryn resimdeýdi baqylaýǵa, tasymaldanatyn ýrnalardyń qasynda júrýge, usynystar berýge jáne esep komıssııasynyń sheshimderi boıynsha shaǵym jasaýǵa, sondaı-aq paıdalanylmaǵan bıýlletenderdi joıý kezinde istiń basynda bolýǵa quqyly. Foto jáne beınejazba jasaýǵa ruqsat etiledi.
Buzýshylyq faktilerin anyqtaǵan jaǵdaıda baıqaýshy esep komıssııasynyń múshelerin habardar etedi. Olqylyqtar joıylmaǵan nemese negizdelgen bas tartý usynylmaǵan jaǵdaıda, ol aımaqtyq jáne aýmaqtyq partııalyq baqylaý komıssııasyna shaǵymdanýǵa quqyly.
Tıisti organ bergen málimettermen kelispegen jaǵdaıda, baıqaýshy shaǵymdy komek@nurotan.kz elektrondy pochtasy boıynsha Ortalyq partııalyq baqylaý komıtetine joldaı alady. Ol eki kún ishinde túpkilikti sheshim shyǵarýǵa mindetti. Sondaı-aq 8 (800) 080 4441 arnaıy jedel jeli uıymdastyrylǵan.
«Sonymen qatar onlaın-daýys berý ótkizý úshin biz otandyq ІT-mamandarmen birlesip, «Praımerız» aqparattyq júıesin ázirledik. Ol saılaý barysyna qandaı da bir zańsyz aralasý nemese kenetten «irkilip» qalý yqtımaldyǵyna jol bermeı, daýystardy naqty ýaqyt rejıminde sanaý múmkindigin kózdeıdi.
Jalpy, qazirgi kezde ashyq ta ádil partııaishilik saılaýdyń ótýine qajetti barlyq jaǵdaı jasalǵan. Partııa Lıderi Nursultan Nazarbaev praımerız bastalar kúni atap ótkendeı, bastysy – aıqyndyq pen tazalyqty, barlyq qatysýshylarǵa teń múmkindik pen básekelestikti qamtamasyz etý.
Taǵy da barshańyzdy praımerızge qatysýǵa shaqyramyn»,-dep jazdy partııa tóraǵasynyń birinshi orynbasary.
Aıta keteıik, partııaishilik saılaýǵa úmitkerlerdi usyný men tirkeý merziminiń bitýine nebári bir aptadan astam ýaqyt qaldy. Baıqaýshylarǵa arnalǵan erejemen tolyǵyraq nurotan.kz jáne primaries.kz saıttarynda ornalastyrylǵan nusqaýlyqtan tanysýǵa bolady.
