«Nur Otan» partııasynyń Ortalyq apparatynyń basshysy men ıdeologııa máseleleri jónindegi hatshysy taǵaıyndaldy
Partııanyń ıdeologııa máseleleri jónindegi hatshysy bolyp Qumar Aqsaqalov taǵaıyndaldy. Ol Máskeý aýyl sharýashylyǵy óndirisiniń ınjenerler ınstıtýtyn támamdaǵan, ekonomıka ǵylymdarynyń kandıdaty. Ár jyldary Qostanaı oblysy aýdandarynyń ákimi, QR Prezıdenti Ákimshiliginiń memlekettik ınspektory, Jambyl oblysy ákiminiń áleýmettik máseleler men ıdeologııa jónindegi orynbasary qyzmetterin atqarǵan.
2010 jyldan beri - «Nur Otan» partııasy Ortalyq apparatynyń basshysy, Saıası keńestiń múshesi.
Ideologııa máseleleri jónindegi jańa hatshyny tanystyra kele, Baýyrjan Baıbek partııa kóshbasshysynyń tapsyrmasy boıynsha «Nur Otannyń» aımaqtardaǵy qyzmeti artyp, partııa jumysy «jobalyq vertıkal» boıynsha jasaqtalyp jatqanyn atap ótti.
«Qumar Aqsaqalovtyń aýdandyq deńgeıden Prezıdent ákimshiligine deıingi túrli memlekettik organdardaǵy jumys tájirıbesi oǵan qoıylǵan mindetter bıiginen kórinýine múmkindik beretinine senemin. Bul taǵaıyndaýdy atqarylǵan jumysqa berilgen joǵary baǵa dep sanaımyn», - dedi B.Baıbek.
Al partııanyń Ortalyq apparatynyń basshysy bolyp Ásel Júnisova taǵaıyndaldy.
Ásel Júnisova Ál-Farabı atyndaǵy QazUÝ, Japonııanyń joǵary memlekettik basqarý mektebin támamdaǵan, ekonomıka ǵylymdary jáne memlekettik basqarý magıstri.
Ár jyldary munaı-gaz salasynda, Strategııalyq josparlaý agenttiginde, Ekonomıka jáne bıýdjettik josparlaý mınıstrliginde, «QazTransGaz»AQ, «Samǵaý» Ulttyq ǵylymı-tehnologııalyq holdınginde jáne «Ońtústik» ÁKK qyzmet atqarǵan. 5 jylǵa jýyq ýaqyt boıy QR Prezıdenti Ákimshiliginde sektor meńgerýshisi, keıin Strategııalyq zertteýler men taldaý ortalyǵy meńgerýshisiniń orynbasary bolǵan.
2013 jyly naýryz aıynda «Nur Otannyń» Ortalyq apparaty basshysynyń orynbasary bolyp taǵaıyndalǵan, partııanyń Saıası keńesiniń múshesi.
Ortalyq apparattyń jańa basshysyn tanystyrǵan B.Baıbek partııa músheleriniń 60%-y názik jandylar ekenin, al «Nur Otannyń» Saıası keńesiniń ókiletti organynda 30% áıelder qaýymy jumys jasaıtynyn atap ótti.
«Ásel Júnisova «Nur Otandaǵy» basshylyq laýazymǵa taǵaıyndalǵan tuńǵysh áıel bolyp otyr. Bul partııa kóshbasshysy tarapynan úlken senimdi bildiredi. Bul taǵaıyndaýdy basqarýshy partııanyń, sonymen qatar qoǵam men memleket jumysynda áıelderdiń mańyzdy róline degen qurmet dep qabyldaımyz», - dep atap ótti B.Baıbek.
