«Nur Otan» partııasynyń barlyq deńgeıdegi fılıaldarynda jemqorlyqqa qarsy forýmdar ótýde - O.Peters
sp;ASTANA. Jeltoqsannyń 1-i. QazAqparat /Gúlmıra Álıakparova/ - «Nur Otan» partııasynyń barlyq aımaqtyq jáne aýmaqtyq fılıaldarynda ótken qarasha aıynyń 10-ynan ústimizdegi jeltoqsannyń 10-na deıin jemqorlyqqa qarsy forýmdar ótýde.
Bul týraly búgin jýrnalısterge partııanyń resmı ókili Oksana Peters jetkizdi, dep habarlaıdy QazAqparat.
«Qarasha aıynda ótken alǵashqy forým jemqorlyqqa qarsy kózqarasty qalyptastyrýǵa, indetke qarsy is-áreket etý maqsatymen memlekettik jáne qoǵamdyq ınstıtýttardy biriktirýge aıtarlyqtaı úles qosty. Jemqorlyqqa qarsy forýmdy turaqty suhbat alańyna aınaldyrý jóninde sheshim qabyldandy», - dedi resmı ókil.
Qazirgi ýaqytta óńirlerde ótip jatqan forýmdarda, 2008 jylǵy qarashanyń 6-synda ótken jemqorlyqqa qarsy alǵashqy forýmda Elbasy, partııa Tóraǵasy Nursultan Nazarbaevtyń júktegen tapsyrmalarynyń oryndalý nátıjesi, sondaı-aq partııa fılıaldarynyń osy baǵytta 2009 jyly atqarǵan jumystary qorytyndylanyp, baǵdarlamany iske asyrýdyń basqa da joldary aıqyndalýda.
Sondaı-aq shara aıasynda «Ózińnen basta», «Ashyq esik kúnderi» aktsııalary ótkizilip, «Jemqorlyqqa qarsy úzdik únparaq», «Jemqorlyqpen kúres sharalaryn jan-jaqty qamtyp, úzdik nasıhattaýshy» saıystarynyń qorytyndysy shyǵarylyp, áleýmettik saýalnamalar uıymdastyrylady.
Forým búgin, jeltoqsannyń 1-i kúni Almatyda, erteń Mańǵystaý jáne Soltústik Qazaqstan oblystarynda, jeltoqsannyń 3-i Aqmolada, jeltoqsannyń 4-inde - Batys Qazaqstanda, jeltoqsannyń 7-si Astana qalasy men Jambyl oblysynda ótedi.
