«Nur Otan» partııasynyń baǵdarlamasy qoǵamdaǵy ózekti máselelermen úndes - sarapshy
«Elimizdiń bas partııasy, halyqtyq partııa sıpatyna ıe bolǵan «Nur Otan» búginde 20 jyldyq tarıhyna kóz júgirtip, jetken jetistikteri men Qazaqstan halqynyń ıgiligi úshin atqarǵan eńbekterine esep berip, saıası júıedegi rólin jáne aldaǵy jyldarǵa maqsattaryn aıqyndap, mindetterin saralaýda. Osyǵan baılanysty úlken is-shara partııa tóraǵasy - Qazaqstan Respýblıkasy Prezıdenti Nursultan Nazarbaevtyń qatysýymen, «Nur Otan» partııasynyń barlyq aımaqtardan 2 myńǵa jýyq músheleriniń basqosýymen ótkizilip otyr. «Nur Otan» partııasynyń 20 jyldyq tarıhyn saraptasaq, partııa únemi óziniń saılaýaldy baǵdarlamalarynda qoıylǵan mindetterdi oryndaýǵa bar kúsh-jigerin salyp, sol baǵytta qoǵamdy jumyldyrýǵa umtylyp otyrdy. Partııa baǵdarlamasy memlekettik saıasatpen, memlekettik mańyzdy strategııalyq qujattarmen, qoǵamdaǵy ózekti máselelermen úndes boldy», - deıdi sarapshy.
Ásel Nazarbetovanyń aıtýyna qaraǵanda, partııa Qazaqstannyń damý jolymen qatar, kúrdeli saıası, áleýmettik-ekonomıkalyq kezeńderden ótken.
«Búginde «Nur Otan» partııasy quramynda qoǵamnyń ártúrli toptarynan quralǵan 1 mıllıonnan asa múshesi bar. Jańasha baǵytta, zamanaýı stılde halyqqa qyzmet etetin, el azamattaryn ortaq mindetterdi sheshýge jumyldyra alatyn áleýeti bar eń iri partııa, shynaıy saıası kúsh. Partııanyń atqaryp otyrǵan qyzmetiniń aýqymy klassıkalyq sıpattaǵy partııalardan da keń, sebebi ol «Nur Otannyń» domınantty partııa bolýymen baılanysty. Qazaqstanda qalyptasqan saıası júıe modeli is júzinde óziniń ómirsheńdigin kórsetti, ıaǵnı domınantty partııa qoǵamdaǵy turaqtylyqty qamtamasyz etýge, memlekettik saıasattyń baǵdarynyń naqty bolýyna zor yqpal etedi», - deıdi ol.
Sarapshynyń pikirine qulaq assaq, jańadan saılanǵan Úkimettiń aldyna qoıylǵan basty mindet áleýmettik salany jańǵyrtý, áleýmettik saıasatty jańa jolǵa qoıý bolyp otyr. Al sol memlekettik bılik organdarynyń jumysyn baqylap, olarǵa usynys berip, syn-pikir aıtyp, halyqtyń muń-muqtajyn jetkizetin partııa ókilderi bolǵandyqtan, «Nur Otan» partııasynyń da aldaǵy ýaqyttaǵy basty mindetteri áleýmettik salaǵa baǵyttalmaq.
«Elbasynyń byltyrǵy 5 qazandaǵy Joldaýynda, partııa sezinde bergen tapsyrmalary - halyqtyń ál-aýqatyn jáne ómir súrý sapasyn jaqsartýǵa arnaldy. ıAǵnı kópbalaly jáne turmysy nashar otbasylarǵa, áleýmettik jaǵynan az qamtylǵan jandardy jumyspen qamtý, turǵyn úımen qamtamasyz etý arqyly kómek kórsetý, bıýdjettiń qomaqty bóligin - 45 paıyzyn jáne Ulttyq qordyń qarajatyn osy baǵytqa jumsaý, sonymen qatar densaýlyq saqtaý, bilim berý salalarynyń sapasyn jáne qoljetimdiligin arttyrý, óńirlerdi keshendi damytý kózdelýde. Atalǵan maqsat pen mindetter «Nur Otan» partııasynyń 2030 jylǵa deıingi baǵdarlamasynda kórinis tapty», - deıdi Ásel Nazarbetova.
Sarapshynyń aıtýynsha, endigi kezekte partııa basshylyǵy, partııa músheleri men «Jas Otan» jastar qanaty birlese otyryp, alǵa qoıǵan tapsyrmalardy oryndap, halyqtyń ál-aýqatyn, turmys deńgeıin, ómir súrý sapasyn arttyrý arqyly elimizdiń odan ári damýyna bar kúsh-jigerin salady.
«Shynaıy saıası kúsh tuǵyrynan túspeı, halyqtyq partııa sıpatynda saqtalady degen senim bildiremiz. Osy jolda Elbasy atap ótken basty ulttyq ıdeıa - el birligi, ekonomıka, ıntellektýaldy órkendegen memleket qaǵıdattaryn basshylyqqa alǵan jón», - deıdi sarapshy.
Aıta ketsek, búgin elordadaǵy Táýelsizdik saraıynda Elbasy Nursultan Nazarbaevtyń tóraǵalyǵymen «Nur Otan» partııasynyń kezekti XVIII sezi ótti. Jıynda Memleket basshysy halyqty qoldaýǵa arnalǵan birshama áleýmettik bastamalar týraly sóz qozǵaǵan bolatyn.
Foto: kisi.kz
