«Nur Otan» partııasynan usynylǵan azamattardyń 50-i buryn Májilis depýtattyǵyna saılanbaǵan
ASTANA. 7 jeltoqsan. QazAqparat /Aıdar Ospanalıev/ - Májilis depýtattarynyń kezekten tys saılaýyna qatysý úshin «Nur Otan» partııasynyń atynan usynylǵan úmitkerlerdiń barlyǵynyń joǵary bilimi bar.
Olardyń 40 paıyzǵa jýyǵy arnaıy dıplomy bar zańgerler men ekonomıster. Al 35 paıyzy halyq sharýashylyǵynyń túrli salasynda eńbek etip júrgen mamandar. Búgin Ortalyq saılaý komıssııasynyń kezekti májilisinde atalmysh komıssııa tóraǵasy Qýandyq Turǵanqulov osyndaı derekter keltirdi.
Q.Turǵanqulovtyń aıtýynsha, 2011 jyldyń 5-shi jeltoqsany kúni Májilis depýtatynyń kandıdattyǵynan úmitker retinde saıası partııalar atynan usynylatyn azamattardy tirkeý merzimi aıaqtaldy. Barlyǵy OSK-ǵa 8 partııa úmitkerler tizimin usyndy. Olar «Nur Otan» halyqtyq demokratııalyq partııasy, Qazaqstannyń patrıottar partııasy, Qazaqstannyń sotsıal-demokratııalyq «Aýyl» partııasy, «Rýhanııat» partııasy, «Ádilet» demokratııalyq partııasy, Jalpyulttyq sotsıal-demokratııalyq partııasy, Qazaqstannyń «Aq jol» demokratııalyq partııasy, Qazaqstannyń kommýnıstik halyqtyq partııasy.
«7-shi jeltoqsanda Ortalyq saılaý komıssııasy alǵashqy partııalyq tizim - «Nur Otan» halyqtyq demokratııalyq partııasynyń tizimin tirkedi. Atalmysh partııa atynan tirkelgen kandıdattardyń arasynda 6 ulttyń ókili bar. Sondaı-aq kandıdattardyń 20 paıyzdan astamy áıelder. Partııalyq tizimdegi azamattardyń basym kópshiligi 55 jasta. Olardyń eń jasy 36-da. Kandıdattardyń 50 paıyzy buryn Májilis depýtattyǵyna saılanbaǵan. Sonymen qatar kandıdattardyń arasynda ǵylym, bilim, mádenıet qaıratkerleri, áıgili sportshylar men kommertsııalyq qurylymdardyń jáne memlekettik ogandar men mekemelerdiń qyzmetkerleri bar»,-dedi OSK tóraǵasy.
Onyń málimetterinshe, kúntizbelik josparǵa sáıkes, saıası partııalardyń tizimderin tirkeý 15-shi jeltoqsanǵa deıin jalǵasady.
Al 16-shy jeltoqsanan bastap, partııalar úgit-nasıhat jumystaryna kirise alady.
