«Nur Otan» partııasy janyndaǵy Quqyqtyq keńestiń jyldyq jumysy qorytyndylandy
Keńes tóraǵasy, Qazaqstan Respýblıkasy Parlamenti Májilisiniń Zańnama jáne sot-quqyqtyq reforma komıtetiniń jetekshisi Qanat Mýsın 10 jyl ishinde Zań keńesi zańnamalyq normalardy jetildirý boıynsha usynystardy talqylaý men ázirleý úshin tıimdi alań bolǵanyn aıtty.
Keńes tóraǵasy 2020 jyly atqarylǵan isterdi qorytyndylaı kele, 8 otyrys barysynda Ákimshilik is júrgizý kodeksi jobasynyń qoldanystaǵy erejeleri, Qoǵamdyq keńesterdiń tıimdiligin arttyrý máseleleri, ekologııalyq zańnamanyń jańashyldyǵy, shaǵyn jáne orta bıznesti zańnamalyq qoldaý máseleleri talqylandy dep atap ótti.
Atap aıtqanda, qazan aıynda Ekologııalyq kodeks jobasyn talqylaý qorytyndysy boıynsha Quqyqtyq keńes 13 usynym ázirlep, Úkimetke joldaǵan, onyń 4-ýi zań jobasynda eskerildi.
Quqyqtyq keńestiń bıylǵy keńeıtilgen qorytyndy jıyny pandemııa men ekonomıkalyq jaǵdaıdyń nasharlaýy jaǵdaıynda shaǵyn jáne orta bıznesti zańnamalyq qoldaý máseleleri boıynsha ótti. Talqylaýdan keıin zańnamaǵa ınvestıtsııalardy tartý jáne qoldaý, ınvestıtsııalar týraly strategııalyq kelisimdi engizý máseleleri boıynsha ózgerister usynyldy. Nátıjesinde Úkimetke 12 usynys jiberildi.
2021 jylǵa arnalǵan jumys josparyn talqylaý kezinde Quqyqtyq keńes músheleri eldiń joǵary oqý oryndarynda quqyqtyq bilim deńgeıin kóterýge, bitimgershilik rásimderi men medıatsııany jetildirýge nazar aýdarý qajettigin atap ótti.
Sondaı-aq, Keńes qyzmetiniń 10 jyldyǵyna oraı ótken jıyn barysynda onyń belsendi músheleri azamattardyń quqyqtary men zańdy múddelerin qorǵaýdy qamtamasyz etýge qosqan zor úlesi úshin qurmet gramotalarymen marapattaldy.
Olardyń qatarynda QR Parlamenti Senaty Tóraǵasynyń orynbasary Nurlan Ábdirov, Májilis depýtaty Gúlnar Bıjanova, «Astana» Halyqaralyq ǵylymı kesheniniń qylmystyq ádilet ortalyǵynyń jetekshisi, professor Isıdor Borchashvılı, M.Nárikbaev atyndaǵy QazMZÝ-dyń qylmystyq sot tóreligi jáne ǵylymı-quqyqtyq saraptama boıynsha ǵylymı jobalardyń jetekshisi, professor Marat Qoǵamov, Joǵarǵy Sot Keńesiniń múshesi Balgúl Raısova, Kásipodaqtar federatsııasy tóraǵasynyń orynbasary Muhtar Tinikeev jáne taǵy basqalar bar.
