«Nur Otan» partııasy umytylǵan batyrlardyń týystaryn izdestirýge kiristi
Partııa Tóraǵasynyń birinshi orynbasary Máýlen Áshimbaevtyń aıtýynsha, 9 mamyr - Jeńis kúnine oraı respýblıkalyq aktsııa jarııalandy. Sonyń aıasynda erligi eskerilmeı qalǵan batyrlardyń týǵan-týysqandaryn izdestirý jumystary atqarylady. Negizgi maqsat - umytylǵan batyrlardyń isterin xalyqqa jetkizý, olardyń erlikterin tarıxta qaldyrý. "Resmı derekterge sáıkes, II Dúnıejúzilik soǵys kezinde Qazaqstan jerinen shyqqan júzdegen azamat erlik jasap, jankeshtiligimen kózge tústi. Olardyń sany odan da kóp bolýy ábden múmkin. Batyrlyq kórsetse de, tıisti dárejede marapattalmady. Sol kezde olardyń erligi eskerilmeı qaldy. Osyǵan baılanysty biz "Umytylǵan batyrlar" jobasy aıasynda arnaıy aktsııany jarııaladyq. Árıne, ol batyrlardyń barlyǵy o dúnıelik bolyp ketti. Degenmen, biz olardyń týǵan-týystaryn, balalaryn, nemerelerin taýyp, atalary jasaǵan erlikterdi jetkizýimiz kerek", - dedi M.Áshimbaev QazAqparat tilshisine bergen suxbatynda.
Onyń aıtýynsha, "Umytylǵan batyrlar" jobasy aıasynda bólek bir jınaqty da shyǵarý josparlanyp otyr. Osylaısha, olardyń erlikterin tarıxta qaldyrý qajet.
Aıta keteıik, buǵan deıin «Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly da "Umytylǵan batyrlar" jobasy jaıynda aıtqan bolatyn. «Olardy Keńes Odaǵynyń Batyry ataǵyna usynǵan. Biraq ártúrli sebeptermen ol ataqty bermegen. Ondaı azamattar kóp. Mysaly, snaıper Tóleýǵalı Ábdibekovti bári biledi. Ol 400-ge jýyq dushpandy óltirgen. Sosyn tankıst Jumash Ahmetov bar. Byltyr ǵana ondaı azamattardyń sany 14-15 adam dep oılaǵanbyz. Qazir biraz jańa derekter shyǵyp jatyr. Soǵan sáıkes, 100-den astam jerlesimiz erekshe erlik kórsetip, Keńes Odaǵynyń Batyry ataǵyna usynylsa da ala almaǵan. Olardyń ishinde eki ret usynylǵandar da bar. Sonda da berilmedi», - deıdi B.Ábdiǵalıuly.
