«Nur Otan» partııasy túrkistandyqtarmen tikeleı efır uıymdastyrdy

TÚRKІSTAN. QazAqparat – «Nur Otan» partııasynyń Túrkistan oblystyq fılıaly áleýmettik jelide tikeleı efır uıymdastyryp, bılik ókilderi turǵyndardyń suraǵyna jaýap berdi, dep habarlaıdy QazAqparat tilshisi.

Partııanyń oblystyq fılıaly tóraǵasynyń birinshi orynbasary Beısenbaı Tájibaev pen Jumyspen qamtýdy úılestirý jáne áleýmetttik baǵdarlamalar basqarmasynyń basshysy Ásııa Temirbaeva, «Memlekettik áleýmettik saqtandyrý qory» AQ fılıaly dırektorynyń mindetin atqarýshy Dáýren Baıyrbekov turǵyndardyń saýaldaryna jaýap berdi.

Tikeleı efır barysynda partııa fılıalynyń Facebook jáne Іnstagram-daǵy resmı akkaýnttarynda 400-den astam suraq qoıylyp, 70-ten astam jeli qoldanýshysy óz paraqshalaryna bólisti. Efırdi 2 myńǵa jýyq adam kórip, maǵlumat aldy.

Suraqtardyń basym bóligi memleket tarapynan beriletin áleýmettik kómekter, 42500 teńge kólemindegi járdemaqy jáne «Biz birgemiz!» aktsııasy aıasyndaǵy azyq-túlik paketi jáne 50 myń teńge mólsherindegi kómekter týraly boldy. Ataýly áleýmettik kómek alý, járdemaqylarǵa qujat tapsyrý máseleleri boıynsha da shaǵymdar tústi.

Spıkerler keıbir suraqtarǵa birden jaýap berse, jekelegeni boıynsha jumystar júrgiziletin bolyp sheshildi.

Oblys halqy onlaın qoǵamdyq qabyldaý ótkizýge muryndyq bolǵan partııa fılıalyna rızashylyǵyn bildirdi. Kómek alyp úlgergen azamattar da alǵystaryn aıtyp jatty.

Aıta keteıik, «Nur Otan» partııasy 20 sáýirde partııa fılıaly tóraǵasynyń birinshi orynbasary Beısenbaı Tájibaev ózi tikeleı efır ótkizgen bolatyn. Ony 1500-den astam adam kórip, 100-den astam suraq joldandy. Turǵyndardyń ótinishteri nazarǵa alynyp, birqataryna jaýap berildi. Soǵan baılanysty partııa fılıaly osy salaǵa jaýapty mekemelerdiń basshylaryn arnaıy shaqyryp, osy joly turǵyndarmen onlaın júzdestirdi.