«Nur Otan» partııasy saılaýshylardyń 81,95 paıyz daýysyn ıelenip, aıqyn jeńiske jetti - Exit-poll
ASTANA. QazAqparat - «Medıa Konsýl» áleýmettik agenttiginiń saılaýdaǵy daýys berý barysynda júrgizilgen exit-poll nátıjesi boıynsha «Nur Otan» partııasy saılaýda elektorattyń 81, 95 paıyz daýysyn ıelenip, aıqyn jeńiske jetti. Bul týraly búgin Astanada ótken brıfıngte Medıa Konsýl» áleýmettik agenttiginiń dırektory ıÝrıı Cherkasov málim etti. Eske sala keteıik, «QR Saılaý týraly» zańnamaǵa sáıkes, exit-poll qorytyndysy BAQ pen qoǵamǵa 21 naýryzda saǵat 00:00-den keıin usynylady.
«Medıa Konsýl» áleýmettik agenttigine exit-poll-ǵa tapsyrysty «Bas redaktorlar klýby» qoǵamdyq birlestigi bergen. Jalpy suraý salý kezdeısoqtyqpen tańdalyp, 40050 adam sharaǵa tartylǵan. Olarǵa «Siz qaı partııaǵa daýys berdińiz?» degen jalǵyz ǵana suraq qoıyldy.
«Saýalnama nátıjesi kórsetkenindeı, «Nur Otan» partııasy - 81,95 paıyz daýys, Qazaqstannyń kommýnıstik halyq» partııasyna - 7,22 paıyz, «Aq jol» partııasyna - 7,24 paıyz, «Birlik» partııasyna - 0,39 paıyz, «Jalpyulttyq sotsıal-demokrattar» partııasyna - 1,20 paıyz, «Aýyl» partııasy 2 paıyz daýys jınady», dedi ıÝ. Cherkasov.
Agenttik basshysynyń aıtýynsha, saılaý barysynda elimizdiń barlyq oblys ortalyqtarynda, shaǵyn qalalar men aýyldyq okrýgterde barlyǵy 225-teı daýys berý ýchaskesinde saýalnama júrgizilgen.
Ekzıt-poll - damyǵan memleketterde keńinen taralǵan halyqaralyq tájirıbe. Bundaı zertteý biregeı áleýmettik málimetter alýǵa múmkindik beredi ári zertteýler saılaýdyń aıqyndylyǵyn, sondaı-aq tutastaı elektorattyq mádenıetti arttyrady. Zertteý aıasynda Astananyń jáne Almatynyń, sondaı-aq, árbir óńirdiń qalalyq jáne aýyldyq halqy tepe-teń usynylǵan. Saýalnamany ótkizýge 250-ge jýyq suhbat alýshy tartylyp, olardyń jumysyn 16 óńirlik menedjer úılestirgen.
Eske sala keteıik, sońǵy málimetter boıynsha Qazaqstandaǵy Parlament Májilisi men máslıhat depýtattaryn saılaý barysynda 7 mln. 500 myńnan astam saılaýshy daýys berdi. QR Ortalyq saılaý komıssııasynyń tóraǵasy Qýandyq Turǵanqulovtyń aıtýynsha, aldyn ala aqparatqa sáıkes, respýblıka boıynsha tizimge engizilgen barlyq saılaýshylardyń 77,1 paıyzy daýys berýge qatysty.
«Ótken saılaýlardyń derekterimen salystyrǵanda bul - rekordtyq kórsetkish», - dedi Q.Turǵanqulov.
