«Nur Otan» partııasy saılaýaldy tuǵyrnamasyndaǵy 70 kórsetkishtiń 49-ynda oń nátıjege qol jetti - B.Saǵyntaev

ASTANA. QazAqparat - «Nur Otan» partııasy saılaýaldy tuǵyrnamasyndaǵy 70 kórsetkishtiń 49-y boıynsha oń nátıjege qol jetti. Búgin Memleket basshysy, «Nur Otan» partııasynyń Tóraǵasy Nursultan Nazarbaevtyń jetekshiligimen ótip jatqan «Nur Otan» partııasy Saıası keńesiniń keńeıtilgen otyrysynda birinshi vıtse-premer Baqytjan Saǵyntaev osylaı málimdedi.

Eske salaıyq, Saıası keńeste partııanyń saılaýaldy tuǵyrnamasyn júzege asyrýdyń 2,5 jyl ishinde atqarylǵan sharalarynyń kezeńdik nátıjeleri talqylanýda. Óz baıandamasynda vıtse-premer B.Saǵyntaev «Nur Otan» partııasynyń 2017 jylǵa deıingi saılaýaldy baǵdarlamasynda Úkimet aldynda birqatar ekonomıkalyq-áleýmettik mańyzy bar mindetter qoıylǵanyn atap ótti. Osy maqsatty iske asyrý barysynda eldiń áleýmettik damýynda kóptegen oń qorytyndylarǵa qol jetken. «Máselen, saılaýaldy tuǵyrnamanyń 70 kórsetkishtiń 49-y boıynsha oń nátıjeler alynǵan. Sonyń ishinde 16 kórsetkish merziminen buryn oryndaldy. Qalǵan kórsetkishterge ýaqytyly qol jetkizý úshin Úkimet tıisti sharalardy qabyldaýda», - dedi Baqytjan Saǵyntaev. Onyń aıtýynsha, aǵymdaǵy álemdik kúrdeli ekonomıkalyq ahýaldyń qalyptasýyna qaramastan, on aıdaǵy ІJÓ-niń ósimi 4 paıyzdy quraǵan, al ınflıatsııa deńgeıi 6-8 paıyz dálizinde saqtalyp otyr. Elimizdiń halyqaralyq aktıvteri de qarqyndy ósýde.