«Nur Otan» partııasy sáýir aıynyń sońyna deıin sezd ótkizýdi kózdep otyr

NUR-SULTAN. QazAqparat - «Nur Otan» partııasy sáýir aıynyń sońyna deıin sezd ótkizýdi josparlap otyr. Ol jıynda kezekten tys saılaýǵa túsetin kandıdatty aıqyndaý boıynsha sheshim qabyldanady, dep habarlaıdy QazAqparat tilshisi.

«Kezekten tys saılaýǵa úmitker partııa sezinde usynylady. Ázirge jıynnyń ótetin merzimi aıqyndalǵan joq. Bálkim, sáýir aıynyń sońyna qaraı bolyp qalýy kerek. Biz protsedýraǵa saı áreket etemiz. Sezde kópshiliktiń - partııa músheleriniń daýsymen kandıdatýra boıynsha sheshim qabyldanady», - dedi partııanyń baspasóz hatshysy Álııa Býrıeva QazAqparat tilshisine.

Eske sala ketsek, aǵymdaǵy jyldyń 9 maýsymynda elimizde kezekten tys prezıdent saılaýy ótedi. Bul týraly búgin respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev aıtty.

Memleket basshysy Qasym-Jomart Toqaevtyń respýblıkalyq telearnalar arqyly Qazaqstan halqyna joldaǵan úndeýiniń tolyq mátinin myna siltemeden oqýǵa bolady.