Nur Otan partııasy qandastardyń máselesin sheshýge atsalyspaq
11 jeltoqsan kúni Nur-Sultan qalasynda «Nur Otan» partııasy tóraǵasynyń birinshi orynbasary Baýyrjan Baıbek pen «Otandastar qory» KEAQ prezıdenti Nurtaı Ábiqaev jáne Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov ózara yntymaqtastyq jónindegi memorandýmǵa qol qoıdy. Osy hattamaǵa sáıkes, «Nur Otan» partııasy men «Otandastar qory» jáne Dúnıejúzi qazaqtary qaýymdastyǵy áriptestik qatynasty óristetip, birlesken jobalardy júzege asyrady.
«Aldaǵy ýaqytta «Nur Otan» partııasynyń qoǵamdyq qabyldaýlary men «Otandastar qorynyń» otandastardy aqparattyq qoldaý ortalyǵy arasyndaǵy úılestirý jumystaryn jetildire túsý kózdelip otyr. Aqparattyq qoldaý ortalyǵynyń quramyna biryńǵaı baılanys ortalyǵy men front ofıster kiredi. Qordyń biryńǵaı baılanys ortalyǵy men qoǵamdyq qabyldaýy qandastarǵa qajetti normatıvti-quqyqtyq aktiler boıynsha aqparattyq jáne konsýltatıvtik keńes berip, týyndaǵan máselelerdiń oń sheshilýine naqty qoldaý kórsetedi. Front-ofıster Dúnıejúzi qazaqtary qaýymdastyǵymen birlesip, qolǵa alynǵan joba. Koll ortalyqtyń ashylǵan kúni 22 sáýirden beri 2640 qandasymyz qońyraý shalyp, habarlasty. Front-ofısterge 1587 qandasymyz qabyldaýǵa kelgen. Onda qandastarymyz QR azamattyǵyn alý, kórsetiletin memlekettik qoldaý sharalary, QR turýǵa ruqsat beretin yqtııar hat, oralman mártebesin alý, shettegi qazaq dıasporasymen baılanysty nyǵaıtý máselelerin kótergen. Bul máselelerdiń barlyǵy derlik aqparattyq baılanys ortalyǵynyń tikeleı yqpalymen tıisti mekemeler arqyly jedel sheshimin tapty» delingen habarlamada.
Aldaǵy ýaqytta osy qyzmetti odan ári tıimdi etý úshin «Nur Otan» partııasynyń óńirlerdegi qoǵamdyq qabyldaýymen birlesip jumys júrgizý máseleleri qarastyrylmaq. Partııanyń qoǵamdyq komıssııalary men keńesteri arqyly jergilikti ákimshilikterdiń qandastar kótergen máselelerdi ońtaıly sheshýine kómektesýge, yqpal etýge bolady. Bul qandastarǵa kórsetiletin kómektiń sapasyn joǵary deńgeıge kótere túspek.
«Nur Otan» partııasynyń oblys ortalyqtary men qalalarda, aýdan ortalyqtarynda fılıaldary belsendi jumys isteıdi. Buǵan qosa «Nur Otan» partııasynyń qoǵamdyq saıası ınstıtýty, «Jas Otan» jastar qanaty, Saıası menedjment mektebi, NUR Media holdıngi - ózindik tájirıbesi qalyptasqan qurylymdar. Olardyń jurtshylyqpen kezdesetin jan-jaqty baǵyttaǵy jıyndar men kezdesýler,konferentsııalar ótkizetin, pikir almasatyn túrli alańdary men saraptamalyq taldaý ortalyqtary bar.
«Otandastar qory» ekijaqty yntymaqtastyqty damyta otyryp, osy alańdardy qandastarymyzdyń máselelerin talqylaýǵa, sheshýge tıimdi paıdalanýǵa múddelilik tanytyp otyr.
