Nur Otan partııasy iKomek-ke qosyldy

Qalalyq monıtorıng jáne jedel áreket etý ortalyǵynyń basshysy Jannat Dýbırovanyń aıtýynsha, tehnık mamandar aldymen partııaǵa qarasty qoǵamdyq qabyldaýlardyń jumysyn zerdelep shyqty. Odan keıin ony tsıfrlyq formatqa túsirip, 109 ıntellektýaldyq baılanys ortalyǵyna qosty. Osylaısha, ortaq júıede partııanyń qoǵamdyq qabyldaýlaryna beıimdelgen qyzmet iske qosyldy. Sonyń nátıjesinde partııaǵa túsken aryz-shaǵymdardy birden tıisti mekemelerge jiberýge múmkindik bar.

«Buryn «Nur Otan» partııasynyń qoǵamdyq qabyldaýlary aryz-shaǵymdardy qaǵaz júzinde qabyldap, sonyń negizinde kommýnaldyq mekemelerge hat jazyp otyratyn. Suraý salyp, jaýap kútetin. Qazir biz bárin bir júıege qostyq. Qoǵamdyq qabyldaý belgili bir máseleni tirkeýge alsa, atalǵan problema birden tıisti kommýnaldyq qyzmetke jiberiledi. Bylaısha aıtqanda, biz partııanyń qoǵamdyq qabyldaýlarynda otyratyn mamandarǵa ortalyq júıege kirýge múmkindik berdik. Endi, olar qaǵaz toltyryp otyrmaıdy. Ortaq júıege barlyq problemalardy jazyp, birden jaýapty mekemelerge jiberedi», - dedi J.Dýbırova QazAqparat tilshisine bergen suhbatynda.

Qazirgi kezde iKomek109 qyzmetin Nur Otan partııasynyń portalymen ıntegratsııalaý máselesi de pysyqtalyp jatyr.

Aıta keteıik, iKomek júıesinde jaýapsyz PIK-terdiń tizimi de bar. Ázirshe, ony tek ákimdik qyzmetkerleri ǵana kóre alady. Degenmen, aldaǵy ýaqytta arnaıy portal iske qosylady. Sol jerde barlyq aqparat ashyq jarııalanady. «Máselen, búginde PIK-terdiń tizimi bar. Onda óz qyzmetine jaýapty jáne jumysty nashar isteıtin kompanııalardyń barlyǵy kórsetilgen. Dál qazir men olardyń bárin ataı almaımyn. Degenmen, aldaǵy ýaqytta halyq barlyq aqparatty kóre alady. Qazirgi kezde biz arnaıy portaldy ázirlep jatyrmyz. Sol jerde barlyq aqparat jarııalanady. Shamamen, mamyr aıynda ol portal iske qosylady», - dep atap kórsetti J.Dýbırova. Ortalyq basshysy astanalyqtardy qandaı máselelerdiń mazalaıtynyn da aıtyp berdi.