«Nur Otan» partııasy Biryńǵaı ulttyq densaýlyq saqtaý júıesiniń júzege asyrylýyna qadaǵalaý jasaý úshin medıtsınalyq mekemelerge beketter ornatpaq
ASTANA. Qańtardyń 10-y. QazAqparat - Ústimizdegi jylǵy qańtardyń 14-i kúni Astana qalasynda ornalasqan densaýlyq saqtaý mekemelerinde, aǵymdaǵy jylǵy qańtardyń 1-inen bastap respýblıkada engizile bastaǵan Biryńǵaı ulttyq densaýlyq saqtaý júıesiniń júzege asyrylýyna qadaǵalaý jasaıtyn beketter ashylady,
dep habarlaıdy QazAqparat «Nur Otan» halyqtyq-demokratııalyq partııasy Astana qalalyq fılıalynyń baspasóz qyzmetine silteme jasap.
Esterińizge sala keteıik, aǵymdaǵy qańtardyń 1-inen bastap Qazaqstan Respýblıkasynda el Prezıdenti N.Nazarbaevtyń tapsyrmasyna sáıkes ázirlengen - Biryńǵaı ulttyq densaýlyq saqtaý júıesi engizile bastady (BUDSJ). Ony oryndaý maqsatynda QR Úkimeti 2009 jylǵy tamyzdyń 4-i kúni «QR Birińǵaı ulttyq densaýlyq saqtaý júıesin júzege asyrý boıynsha is-sharalar josparyn bekitý týraly» qaýly qabyldaǵan bolatyn.
«Nur Otan» HDP-nyń partııalyq beketteri densaýlyq saqtaý júıesiniń reformalaný úrdisine qoǵamdyq qadaǵalaýdy júıeli uıymdastyrý jáne BUDSJ-nyń engizilý tıimdiligine monıtorıng júrgizý maqsatynda qurylyp otyr. Sondaı-aq, olar medıtsınalyq qyzmetterdiń sapasy men olarǵa qol jetimdikti qamtamasyz etip, qyzmetterdi paıdalanýshy azamattarmen keri baılanysty ornatýǵa múmkindik bermek», - dep atap ótti baspasóz qyzmetinen.
Beketterdiń negizgi maqsaty - BUDSJ júzege asyrylatyn barlyq densaýlyq saqtaý mekemelerinde partııalyq qadaǵalaýdy júrgizip, jańa júıeniń iske asý tıimdiligine táýelsiz baǵa berý, sondaı-aq kórsetiletin kepildendirilgen tegin medıtsınalyq kómektiń ashyqtyǵyn qamtamasyz etý, densaýlyq saqtaý mekemeleriniń qyzmetin jaqsartý boıynsha usynymdar ázirleý.
Beketterdi tanystyrý is-sharasyna «Nur Otan» HDP tóraǵasynyń birinshi orynbasary Nurlan Nyǵmatýlın, QR Densaýlyq saqtaý mınıstri Jaqsylyq Dosqalıev, partııanyń elordalyq fılıaly tóraǵasynyń birinshi orynbasary Pavel Kazantsev jáne basqa da quzyrly uıymdardyń basshylary qatysady dep josparlanýda.
