«Nur Otan»: Partııanyń ataýy latyn qarpinde jazylady
«Elbasy - «Nur Otan» partııasynyń tóraǵasy mindetteri men tapsyrmalaryn negizge ala otyryp, qujatty tolyqtyryp, partııa baǵdarlamasyn qabyldaý usynylady», - dedi «Nur Otan» partııasy Tóraǵasynyń birinshi orynbasary Máýlen Áshimbaev «Nur Otan» partııasynyń kezekti XVIII sezi barysynda.
Sezge qatysyp otyrǵan partııa músheleriniń bári bul usynysty qoldap, Elbasy Nursultan Nazarbaevtyń strategııalyq baǵyt-baǵdaryn júzege asyrýǵa arnalǵan «Nur Otan» partııasynyń 2030 jylǵa deıingi baǵdarlamasy biraýyzdan qabyldandy.
«Sońǵy bes jyldyń ishinde zańnamalyq ózgerister men jańa tájirıbelerge sáıkes, partııa jarǵysyna keıbir normalardy engizý qajettigi týyndap otyr. Eń aldymen, qazaq tiliniń latyn álipbıine kóshýine baılanysty partııanyń memlekettik tildegi ataýynda latyn áripterin qoldaný usynylýda. Ekrannan partııanyń jańartylǵan logotıpin kórýlerińizge bolady. Usynylyp otyrǵan logotıpte kúnniń 17 sáýlesi beınelengen. Ol bizdiń oblystarymyz ben Almaty, Shymkent, Astana qalalaryn sımvolıkalyq turǵyda beıneleıdi. Osy rette partııanyń latyn álipbıindegi ataýyn - Partııa Tóraǵasynyń óz qolymen jazǵanyn atap ótkim keledi», - dedi Máýlen Áshimbaev ekrannan «Nur Otan» dep latyn áripterine ózgertilgen logotıpti kórsete otyryp.
