Nur Otan óńirlerdegi vaktsınalaý barysyn baqylaýǵa alady

NUR-SULTAN. QazAqparat - Turǵyndarǵa COVID-19-ǵa qarsy ekpe salý jáne vaktsınalardy aımaqtarǵa bólý «Nur Otan» partııasynyń baqylaýyna alynady. Bul týraly Partııalyq baqylaý komıtetiniń birinshi uıymdastyrýshylyq otyrysynda belgili boldy, dep habarlaıdy QazAqparat.

Jıynda jańa quram bekitilip, aldaǵy jylǵa arnalǵan jumys jospary anyqtaldy.

Partııanyń baspasóz qyzmeti habarlaǵandaı, óńirlerdegi partııalyq baqylaý komıteti men komıssııalarynyń birinshi kezektegi mindeti – elektoraldyq mindettemelerdiń oryndalýyna júıeli baqylaýdy qamtamasyz etý.

Sondaı-aq, ózekti baǵyttardyń qatarynda memlekettik organdardyń azamattardyń ótinishterine tııanaqty qarap, sapaly jumys isteýine, bıýdjet qarajatyn jumsaýdyń tıimdiligine monıtorıng júrgizý sııaqty taǵy da basqa máseleler bar.

Partııa janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńestiń de jumys kestesi men jańa quramy birinshi otyrysta bekitildi.

«Sybaılas jemqorlyq – bul para berý men para alý ǵana emes. Óz mindetterine nemquraıly qaraý jáne bıýdjet qarajatyn tıimsiz jumsaý da sonyń kórinisi. Onymen barlyq sharalardy qoldana otyryp kúresýimiz qajet», - dedi Erlan Saırov.

Eske sala keteıik, buǵan deıin «Nur Otan» Tóraǵasynyń birinshi orynbasary Baýyrjan Baıbek óziniń Facebook-tegi paraqshasynda bıleýshi partııanyń óziniń saılaýaldy ýádelerin iske asyrýdy qalaı qamtamasyz etýge nıetti ekenin aıtqan bolatyn.

Onyń aıtýynsha, Elbasy, partııa Lıderi Nursultan Nazarbaevtyń tapsyrmasy boıynsha, sondaı-aq el prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý aıasynda partııanyń qoǵamdyq keńesteriniń jumysy júıeli túrde qaıta qurylymdalady.

Saıası keńes Bıýrosynyń sheshimimen taratylǵan partııalyq kýratorlar ınstıtýtynyń oryna «Nur Otan»-nyń saılaýaldy baǵdarlamasynyń naqty baǵyttarynyń iske asyrylýyn baqylaý boıynsha 14 respýblıkalyq qoǵamdyq keńes quryldy. Osyndaı keńester óńirlik deńgeıde de qurylady.

Keńesterdiń jumysy qoǵamdyq pikirdi eskerip, sondaı-aq partııanyń qoǵamdyq qabyldaý bólmelerine el kóleminde azamattardan túsken ótinishterge jasalǵan taldaýǵa negizdele otyryp, jarııa túrde júrgiziledi.

Sonymen qatar, Baýyrjan Baıbek «Nur Otan» keńesteriniń aldynda sarapshylar qaýymdastyǵyn ótkir áleýmettik máselelerdi ashyq talqylaýǵa tartý, sondaı-aq azamattyq bastamalardy qoldaý mindeti turǵanyn atap ótti.