Nur Otan-nyń jas belsendileri Biz Birgemiz volonterler qozǵalysyn qurdy
Búgin bastalǵan «30 ıgi is» respýblıkalyq aktsııasy barysynda jasotandyqtar elordanyń jáne elimizdiń basqa óńirleriniń medıtsına qyzmetkerlerine «alǵys paketterin» taratýdy uıymdastyrdy. Olardyń árqaısynda dárýmenderge baı paıdaly ónimder jıyntyǵy bar.
Partııanyń baspasóz qyzmetiniń málimetinshe, jańa qozǵalys elimizdiń barlyq belsendi jáne janashyr jastaryn birigýge jáne volonterlik qyzmetpen aınalysatyndardy qoldaýǵa shaqyrady. «Jastar-Otanǵa!» 5 jyldyq baǵdarlamasy aıasynda volonterlikke 100 myńǵa jýyq adam tartý josparlanýda.
«Bizdiń volonterlik qozǵalysymyz karantın kezinde azamattardy qoldaý úshin Elbasy, Partııa kóshbasshysy Nursultan Ábishuly Nazarbaevtyń bastamasymen qolǵa alynǵan aktsııanyń atymen atalady. Ótken jyly «Biz Birgemiz!» aktsııasyna 5 myńnan astam volonter tartyldy. Qazir «30 ıgi is» aktsııasy aıasynda osy jastarmen júıeli jumysty jalǵastyrýdy josparlap otyrmyz. Memleket basshysy Qasym-Jomart Kemeluly Toqaev volonterlik qyzmetti damytý, qaıyrymdylyq pen metsenattyqty qoldaý – memlekettiń uzaq merzimdi basymdyǵy ekenin atap ótip, volonterlik uıymdardy qoldaý jónindegi jumysty jalǵastyrý qajettigin aıtty», - dedi «Jas Otan» jetekshisi Nurjan Jetpisbaev.
Táýelsizdiktiń 30 jyldyǵyn merekeleýge oraılastyrylǵan «30 ıgi is» aktsııasy sheńberinde ár aı belgili bir taqyrypqa arnalady: mamyr –«Birlik», maýsym – «Shapaǵat», shilde – «Baqytty otbasy», tamyz – «Damý», qyrkúıek – «Bilim», qazan – «Ómir syıla», qarasha – «Sana», jeltoqsan – «Egemendilik»
Eske sala keteıik, buǵan deıin Elbasy, «Nur Otan» partııasynyń kóshbasshysy Nursultan Nazarbaevtyń tapsyrmasy boıynsha «Birgemiz» qoǵamdyq qory 650 myńnan astam muqtaj otbasyny, ıaǵnı 2,2 mln. qazaqstandyqty tikeleı qarjylyq qoldaýmen qamtyǵan bolatyn.
Qor qarajaty esebinen 2 myńnan astam medıtsına qyzmetkerine qoldaý kórsetilip, sý tasqynynan zardap shekken Maqtaaral turǵyndaryna arnap birneshe ondaǵan jańa úı salyndy.
Jalpy, #BizBirgemiz aktsııasy aıasynda 320 myńǵa jýyq otbasy azyq-túlik sebetterimen jáne birinshi kezekte qajetti taýarlarmen qamtamasyz etildi. Turmysy tómen 100 myń otbasyna 5 mıllıon maska tegin taratyldy.
