«Nur Otan»-nyń Respýblıkalyq saılaýaldy shtaby Almatynyń belsendilerimen kezdesti

ALMATY. QazAqparat – Bıliktegi partııa ókilderi qoǵam belsendilerimen, saıasattanýshylarmen, sarapshylarmen, shaǵyn jáne orta bıznes pen zııaly qaýym ókilderimen, sondaı-aq jas startapshylarmen, ІT mamandarmen, blogerlermen jáne vaınerlermen birqatar kezdesýler ótkizdi, dep habarlaıdy QazAqparat.

Almaty qalasynyń sarapshylar qaýymymen kezdesýde azamattar men memlekettiń arasyndaǵy keri baılanysty jolǵa qoıýda azamattyq sektordyń qatysýy men rólin odan ári keńeıtý máseleleri talqylandy.

Partııa baspasóz qyzmetiniń málimetinshe, bir apta ishinde «Nur Otan» partııasynyń saılaýaldy shtab músheleri elimiz boıynsha 7 myńnan astam kezdesý ótkizip, ol 650 myńnan astam saılaýshyny qamtydy. «Esikten esikke» aktsııasy barysynda jasotandyqtar 174 myńnan astam páterdi aralady.

Shtabtar janyndaǵy qoǵamdyq qabyldaý bólmelerine 8 myńnan astam ótinish kelip tússe, onyń ishinde 2 myńnan astam usynys pen talap-tilek turǵyndardan keldi. Kandıdattar men partııanyń senimdi ókilderi 1,8 myń qabyldaý ótkizip, onyń barysynda barlyǵy 7,6 myń adamdy qabyldady.

Erteń Respýblıkalyq saılaýaldy shtab Aqmola oblysynda birqatar kezdesýler ótkizedi. Odan ári 5 kún qatarynan Qyzylorda, Mańǵystaý, Atyraý, Batys Qazaqstan jáne Aqtóbe oblystarynyń turǵyndarymen kezdesýler josparlanǵan.