Nur Otan-nyń almatylyq shtaby bir aptada 100-den astam shara ótkizdi

ALMATY. QazAqparat - Nur Otan-nyń Almatydaǵy saılaýaldy shtabynda bir aptada 100-den astam shara ótip, ol 13 myń adamdy qamtyǵan, dep habarlaıdy QazAqparat tilshisi.

Kandıdat Qasym-Jomart Toqaevtyń saılaý shtaby bir aptanyń ishinde 100-den astam shara ótkizgen. Shtab bas suqqan oryndardyń ishinde naýbaıhanadan bastap temirjol deposynyń ujymyna deıin bar.

«12 mamyr kúni óz úmitkerimizdiń 200-den astam qoǵamdyq qabyldaýy ashyldy. Bul halyqpen keri baılanysty nyǵaıtyp, saılaýshylardyń talap-tilekterin jınaýǵa septigin tıgizedi. Shtab músheleri apta ishinde 36 qoǵamdyq qabyldaý ótkizip, 316 adamdy tyńdaǵan. Mysaly, 8 balanyń anasy Gúlzat Mamıeva «Baqytty otbasy» partııalyq baǵdarlamasynyń aıasynda jeńil nesıemen 3 bólmeli páterge ıe boldy. Al 13 mamyr kúni kandıdat Qasym-Jomart Toqaevtyń bastamasymen «BIRGE» ulttyq aktsııasyn qolǵa alyndy. Aktsııa aıasynda kez kelgen azamat kandıdatqa óz usynysyn aıta alady», - deıdi «Nur Otan» qalalyq qoǵamdyq shtab basshysy Rahman Alshanov.

Eske salsaq, 11 mamyr kúni Qazaqstan boıynsha QR Prezıdenttigine úmitker 7 kandıdat saılaýaldy úgit-nasıhat jumystaryn bastaǵan.

Buǵan deıin kandıdat Danııa Espaevanyń shtab ókilderi atyraýlyq saılaýshylarymen kezdesse, Amangeldi Taspıhovtyń senimdi ókilderi Aqtaýda zaýyt jumysshylarymen jolyqty. Al Jambyl Ahmetbekovtiń shtaby Astana elektrtehnıka zaýytynyń eńbek ujymymen kezdesti. Kandıdat Ámirjan Qosanovtyń senimdi ókilderi elordadaǵy ortalyq bazarda úgit júrgizse, Sádibek Túgeldiń ókilderi Aqmola oblysynda asyq atý týrnırine qatysyp, kandıdattyń ózi Shýchınskte shyǵarmashylyq keshin ótkizdi. Taǵy bir úmitker Tóleýtaı Raqymbekov QazATÝ ujymymen júzdesip, baǵdarlamasyn tanystyrdy.